KIDAPAWAN CITY -- Blangko pa ang mga awtoridad sa motibo sa pagpamusil-patay sa siyam ka tawo alas 12:10 sa udto niadtong adlaw nga Sabado sa probinsya sa Cotabato.
Giila ang mga napatay nga sila Zailon Sandigan, Kors Salilangan, Benladin Dimanalao, Romeo Balatamay, Katindig Kagayawon, Tong Guiman ug Fahad Mandigan, mga molupyo sa Kabacan Cotabato.
Nakabsan sab sa kinabuhi sila Musaid Jaiden, nagpuyo sa Brgy. Poblacion Midsayap, Cotabato ug Budsal Lipusan nga taga Datu Odin Sinsuat, Maguindanao.
Matud ni Kabacan Mayor Herlo Guzman Jr., nga sakay sa mga motorsiklo ang mga biktima sa provincial road duol sa USM granary and machinery sa Brgy. Poblacion Kabacan Cotabato diin kalit lamang mibutho ang lima ka wala mailhing mga armadong kalalakihan.
Gipakanaog sa ilang motor ang mga biktima, gipangitaan og ID pagkahuman gipamusil gamit ang mga tag-as nga matang sa armas.
Abtik sab nga miikyas ang mga suspetsado nga sakay sa usa ka pick-up kolor itom nga walay plaka nga dunay mga kauban nga tulo nga pulos nagmotor.
Patay on the spot ang walo sa mga biktima ug nadala pa sa mga pulis si Tong Guiaman sa balay tambalanan apan nabugtuan gihapon siya sa kinabuhi.
Hugtanon sab nga gikondena ni Mayor Guzman ang pagpamusil-patay sa mga biktima ug gikatahasan niya ang Kabacan PNP nga gipangulohan ni Police Major Peter Pinalgan nga hingusgan ang imbestigasyon sa hitabo.