PINAAGI sa paugnat sa kusog, padayong nagpalig-on sa iyang pisikal nga kondisyon si Lapu-Lapu City Mayor Junard Chan human niya nasugakod ang hulga sa makalilisang nga coronavirus disease 2019 (Covid-19).

Ang Covid-19 survivor nga si Chan milingaw sa iyang kaugalingon pinaagi sa tennis ug sa ilang friendly tournament nga giulohan og Friendly Covid Tennis Tournament nga gipahigayon sa Lapu-Lapu City tennis court tapad sa City Hall.

Si Chan nisaysay sa Superbalita Cebu nga ilang gisugdan ang maong torneyo nga eklusibo lang sa ilang mga kaila niadtong Hulyo 2020, pipila ka mga adlaw human siya nag-negatibo sa Covid-19.

Ang mayor nag-positibo sa swab test niadtong Hunyo 10, 2020 ug nag-negatibo sa sunod nga test human sa iyang 14 ka mga adlaw nga self-isolation.

Siya mi-donar na og plasma sa donation drive sa Department of Health (DOH).

Iyang giangkon nga sa ka-busy sa iyang schedule karon ang tennis mao ang nahimo niyang stress reliever.

“Grabe gyud atong trabaho. Murag stress and pressure ta and kinahanglan ta og exercise para ma-divert pud panagsa ang atong huna-huna kay lisod if masobrahan ta sa trabaho. Kinahanglan gyud nato magpasingot,” matod niya.

Gihimo ni Chan nga parte sa iyang fitness routine ang tennis ug kung adunay oras moduwa siya niini.

“Dako kaayo nig katabang nga ma-fit ta, labi na karon nga panahuna. Mawala pud ang atong stress,” matod ni Chan, kinsa midugang nga moduwa siya alas siete sa gabie human sa trabaho.

“Importante kaayo ang wellness gyud nimo. I-balance ang imo body sama sa proper sleep, exercise, ang pagkaon mao nay maka-boost sa atong immune system,” dugang niya.

“Kung naa na ang tulo lig-on atong immune system and maka fight gyud ang atong immune system.”

Ang ikatulong edisyon sa Friendly Covid Tennis Tournament nga usa ka doubles event gipahigayon niadtong Agusto 25-29, 2020.

Si Chan ug ang iyang kauban nga si Popoy Salcedo nitabla sa pares ni Atty Rey Cortes ug Mark Anthony Diamante, 7-7.

Ang duha ka teams pulos nikampiyon sa ilang division.

Ang torneyo gisugdan niadtong gipaubos na sa General Community Quarantine ang dakbayan sa Lapu-Lapu.