SUPERBALITA DAVAO

Roldan: RevGov na pud?

Nota Bene

BULAN na sa Septyembre. Wala lang damha naa na ta sa "ber months" timailhan nga taliabot na ang Pasko sa pagkatawo sa Manunubos.

Morag wa gyo'y nag-enjoy kaayo sa 2020 tungod sa Covid-19 pandemic bisan gipanagna sa mga "feng sui expert" ug tigbasa sa bituon sa kalangitan nga bulahan og swerte karong tuiga.

Tingale, sakto sila kay buhi pa man ta bisan kung libuan kanatong nga Pinoy ang gitakbuyan og sakit nga wa pay bakuna. Naluoy sab ko sa administrasyon ni Presidente Rody Duterte nga nagpunay na la'g panagang sa mga batikos nga hinay kuno ang iyang administrasyon sa pagsanta sa problema sa nasud.

Luoy sa kaayo ang nasud kay nahutdan gyod og sapi aron ipanghatag sa kabus nga grabeng naapektohan sa pangkalibutanong krisis sa panglawas. Ang nakadugang pa sa problema kay gawas sa pandemic, naa pa gyod ang mga kalamidad sama sa bagyo ug baha.

Kagahapon sa kaadlawon, Lunes, gitay-og ang Kiblawan og Intensity 5 nga linog sama sa Mati ug Masbate sa niaging mga adlaw. Kung kita ang anaa sa sapatos ni PRody, unsa pud kahay atong mabuhat ug bation?

Nikusog gani ang balita nga nagpatambal siya sa Singapore sa iyang sakit mao nga wa siya magpakita'g duha ka semana. Hinuon gibutyag niya nga may balatian siyang gihambin apan dili ipasabot nga di na niya kaya nga modala sa renda sa panggamhanan karon nga duha na lang ka tuig ang iyang termino.

Abtik sab kaayo ang oposisyon sa panahon nga di na niya kayang mamuno kay siyempre si Vice President Leny Robredo ra ba gyod ang mopuli subay sa konstitusyon sa Pilipinas. Sa niaging semana, naghimo sab siya'g kaugalingong "Vice President State of the Nation Address" isip pagpakita sa madlang pipol nga anaa siya ug andam og tagana.

Ug tungod niini, ang mga orihinal nga grupong nagsuporta kaniadto ni PRody sa iyang pagdagan pagka-presidente nagkisikisi ug nag-show of force sab pinaagi sa usa ka panagtigom nga nanawagan sa presidente nga modeklara og "revolutionary government" (RevGov) samtang baskog pa siya.

Ubos niini, wad-on na ang duha ka balay sa kongreso og tukuron ang "junta" o RevGov Committee nga maoy mopadagan sa gobyerno. Di kini bag-ong lakang sa mga "diehard Duterte supporters" (DDS) kondili giduso kini sa ikaduhang tuig sa iyang paglingkod sa dihang ilang nakita nga di makalihok ang pangulo sa gusto niining buhatong kausaban ubos sa kasamtangang sistema sa gobyerno.

Wala gihatag kaniya sa kongreso ang dugang gahom aron masulbad ang grabeng trapiko sa Metro Manila, problema sa droga, kriminalidad ug uban pa. Napalusot niya ang "anti-terrorism law" apan morag dili ma-implementar tungod sa 15 ka grupo nga nibabag niini sa Korte Suprema.

Buot niyang undangon ang kurapsyon apan mas grabe na hinuon ang balita sa kurapsyon sulod sa gobyerno karon. Apan imbis nga suportahan ni PRody ang RevGov sa iyang mga DDS, gisalikway niya kini ug wala kuno siyay labot sa ilang plano.

Nangutana ang kadaghanan, kang kinsa man diay ning plano sa RevGov na pud? Kamo diha uyon mo ani?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph