COTABATO CITY -- Hugtanon nga gikondena sa Bangsamoro Government ug Moro Islamic Liberation Front (MILF) ang nahitabong masaker sa Kabacan, North Cotabato.
Sumala kang Bangsamoro Transition Authority Deputy Minority Floor Leader Suharto Ambolodto nga niluog ang pagpatay sa mga biktima ug angayan lang nga manubag sa balaod ang mga mamumuno.
Samtang gipamahayag sa Bangsamoro Islamic Armed Forces (BIAF) pinaagi ni Moro Islamic Liberation Front (MILF) Chief of Staff Sammy Almansoor nga ang kamatayon sa ilang mga igsuon nga Muslim nagpahinumdom kanila pag-usab sa kanhing mangitngit nga sugilanon na naagian una pa nakab-ot ang malinawon nga kasabutan tali sa gobyerno ug sa ilang pundok.
Gihangyo sab sa Barmm ug MILF ang National Bureau of Investigation (NBI) nga moabag sa kapulisan sa imbestigasyon sa krimen.
Kahinumdoman nga sakay sa mga motorsiklo ang mga biktima sa provincial road duol sa USM granary and machinery sa Barangay Poblacion sa lungsod sa dihang kalit mibutho ang lima ka wala mailhing mga armadong lalaki daplin sa kalsada.
Gipakanaug sa ilang motor ang mga biktima, gipangitaan og Identification Card, pagkahuman gipamusil gamit ang mga tag-as nga matang sa armas.
Mga mamumuno yano lang nga nisibat sakay sa pick-up kolor itom nga walay plaka nga dunay mga kauban nga tulo nga pulos nagmotor. (Edgar E. Fuerzas)