AKO na ning gipangutana sa una si Arnold Clavio kon tinuod bang duna siyay anak kang Sarah Balabagan kay dugay na man ning isyuha ug ako na ning nasuwat dugay na kaayo dinhi sa Tagming.
Mao ni kadtong panahon nga halos kada tuig pa ming mga sakop sa entertainment editor sa Sugbo mag-adtoan sa GMA-Manila ubos sa imbitasyon sa ilang Corporate Communications department.
Sa usa sa among mga chika ni Clavio sa Manila iya na ning gi-deny. Dili lang ko sure kon unsa tong tuiga na-interbyu namo si Clavio pero maorag wala pa to’y 2010.
Kon tinuod ang gibutyag ni Sarah karon nga 21 anyos na ang ilang anak ni Clavio nga si “Ara” sa ato pa nabuntis siya mga 1998?
Ang ilang relasyon giingong nagsugod niadtong 1996 dihang 17 anyos pa lang si Sarah samtang si Clavio 31 niadtong higayona.
Karon nga mismong si Sarah na ang nitingog nganong dili na man lang ipa-DNA test aron maklaro kon kinsay nagtug-an sa tinuod? Ipa-KMJS na yan! Hehe...
‘BER’ MONTH NA
September 1 na gyud! Unang adlaw sa “ber” month. Excited na ba mo? Ako excited nga maorag di. Sa atong sitwasyon karon di pa gyud kakumpiyansaan.
Hinuon kon nakabantay mo nagkadaghan na ang mga tawo nga nanggawas. Dire sa among lungsod ubay-ubay na kong nakit-an nga mga dyip nga namalik na og pamasada.
Oki ra kay duna may plastic partition ang mga lingkuranan so naa gihapoy social distancing. Ang importante nga mosunod lang gyud ta sa mga protocol kay alang ra man gihapon ni sa atong kaluwasan.
Ampo lang ta nga mahuman na ni sa dili pa mag-2021. Maluoy ang Ginoo.
WAY COMPOSER
Karong “ber” na makadungog na sad ta og mga Paskohanong awit. Pero kahibawo ba mo nga sagad sa atong mga tradisyonal nga Christmas carols nga Binisaya walay mga pangan sa composer?
Sama pananglitan anang “Pasko Sa Binilanggo,” “Ania Kami” or “Alas Dose” ug “Maglipay Kita” walay mga credit kinsay mga composer.
Mao tingali hasta ang kantang “Kasadya Ning Taknaa” nilang Mariano Vestil ug Vicente Rubi giangkon sa una sa taga-Manila kay nagtuo tingali silang wala say composer.
Sa akong nahibaw-an kanang “Pasko sa Binilanggo” gikanta sa No Bail Band samtang kanang “Alas Dose” dunay version ana si Susan Fuentes.
Pareho sad sa “Bato-Balani sa Gugma” o Gozos nga kantahon sa pista senyor. Una ning gisagup sa Archdiocese of Cebu niadtong 1985 apan hangtod karon bisan ang mga kaparian di katubag kon kinsay composer aning kantaha.