MGCQ? Kagahapon natapos ang general community quarantine (GCQ) sa dakbayan sa Sugbo human kini giubos gikan sa general community quarantine (MECQ). Sa akong pagsuwat ning akong lindog, wala pa gibalita kon inaug ba ang dakbayan sa Sugbo ug mga silingan dakbayan sa Mandaue, Lapu-Lapu ug Talisay ngadto sa modified GCQ (MGCQ), nga mao na karon ang estado sa mga lungsod ug component cities sa Probinsya sa Sugbo gawas sa lungsod sa Consolacion ug Minglanilla, ug dakbayan sa Talisay.
Si Cebu city Mayor Edgar C. Labella namahayag nga bisan pa og iubos ni Presidente Duterte sa MGCQ ang dakbayan tungod sa rekomendasyon sa IATF (Inter-Agency Task Force on Emerging Infectious Diseases) dili siya motugot nga mangabli ang mga sinehan ug uban dapit sa kalingawan diin mag-abot ang daghan tawo.
Si Kon. Joel Garganera, deputy chief implementer sa IATF sa Cebu City’s Emergency Operation Center (EOC) namahayag nga subayon karon sa EOC ang pagkatap sa Covid-19 gikan sa gawas sama sa mga mall, tiyangge ug barangay halls diin mag-abot ang daghang mga tawo nga possible nga madala sa tawo ig-uli sa ilang balay.
Matud pa ni Garganera nga ilang nasuta nga 40 porsento sa hinungdan sa pagkuyanap sa Covid-19 nagsugod gikan sa gawas nga madala sa mga tawo ngadto sa ilang panimalay o uban dapit nga ilang maadtoan labina kon gikan sila sa mall, barangay hall, ug mga tiyangge.
Kon manaug man ang dakbayan sa Sugbo ngadto sa MGCQ, angay nga hugtan gihapon ang pagpatuman sa minimum health protocol sama sa husto nga pagsul-ob sa face mask, face shield, distansya matag tawo ug paglimpyo sa kamot gamit ang tubig ug sabon o di ba alcohol. Dili angayan nga mokumpiyansa ang dakbayan.
Maayo ang lakang ni Garganera nga iyang gitigum ang mga barangay opisyal labina kadtong barangay nga dunay mga tiyangge aron strikto nga ipatuman ang mga lagda sa Department of Health (DOH) aron malikayan o maminosan ang pagkuyanap sa Covid-19.
Akong nakita nga daghan mga tindera sa tiyangge ug sa mga gagmay nga tindahan nga di motuman sa husto nga pagsul-ob sa face mask. Naa man tuoy face mask apan kutob ra sa ilang suwang unya magsige og tabi nga ang tinulo gikan sa ilang baba tua padung sa ilang baligya. Ako na ni gihisgutan makadaghan sa akong lindog ug sa social media ang kakuwang sa pagpatuman sa mga health protocol sa mga namaligya.
Diri sa Talamban, naay mga tiyangge, nga maayo nga adtoan kay kadaghanan sa ilang baligya presko ug dili sirado apan naay mga tindera/tindero wa motuman sa husto nga pagsul-ob sa face mask ug ang mga tawo nga mopalit wa motuman sa distansya. Angay na nga ipatuman sa dakbayan ang ordinansa batok sa mga tawo di motuman health protocols. Ang mga barangay tanod mao na ang mopatuman sa ordinansa basi sa sugyot ni Garganera.