BAG-O na ang hepe sa Cebu Provincial Police Office (CPPO) human gihulipan si Police Col. Roderick Mariano kagahapon, Agusto 31.
Ang Campo Crame mipagawas og kamandoan nga si Police Colonel Aladdin Collado gikan sa Special Action Force hulip kang Mariano.
Sakop si Collado sa Philippine National Police Academy (PNPA) Class of 1996 diin ang iyang mga classmate mao silang Police Colonel Josefino Ligan, hepe sa Cebu City Police Office (CCPO), Police Colonel Arnel Banzon sa Negros Oriental ug Police Colonel Jonathan Abella.
Matod ni Police Brigadier General Albert Ignatius Ferro, direktor sa Police Regional Office (PRO) 7, milingkod na isip hepe si Collado apan gipaubos una siya sa isolation sulod sa 14 ka adlaw nga protocol sa kapulisan sa rehiyon.
Si Mariano nahimong hepe sa CPPO sulod sa usa ka tuig ug duha ka buwan diin daghan na usab, matod pa, kinig nahimo labina sa pagpuhag sa mga durugista.
Sa pangidaron nga 50, gibutyag sa heneral nga kinahanglan na nga mosaka ang posisyon ni Mariano gikan sa pagka provincial director ngadto na sa Regional Directorial Staff hangtod nga maabot kini sa 1 star rank.
“The order came from national headquarters. He has been here for almost 1 year and two months, and since he is a prospect for chief of staff, maybe for a more higher position, so I think will be giving him the right to do that because he is already 50 and on the last 6 years he should be going to the ladder,” matod ni Ferro.
Usa sa mga mando ni Ferro sa bag-ong hepe sa CPPO nga likayan ang pagdawat og payola gikan sa drugas ug ilegal nga sugal, mao usab kini ang iyang unang kamandoan isip pangulo sa PRO 7. (AYB)