Talisay gustong mga spaghetti wire mahawan

MGA 90 poryento sa mga barangay sa Dakbayan sa Talisay naproblema sa spaghetti wires.

Dunay mga wire nga nangumbitay sa kadalanan nga posibleng makamugna og disgrasya sa mga motorista, labina sa kagabhion.

Naandan kini nga problema sa mga local government unit sa Metro Cebu nga sud sa dugay nang panahon wa matagad sa pribadong mga kompaniya nga nanag-iya niini.

Sa interview kang Association of Barangay Councils (ABC) president, Konsehal Josefina Concial, niingon nga usa ni sa ilang nahisgutan nga problema sa iyang mga kaubang mga barangay kapitan sa ilang matag buwan nga sesyon.

Matod ni Concial nga duna nay gipasar nga resolusyon nga giuyonan sa tanang mga kapitan sa 22 ka mga barangay sa siyudad aron aksyunan ang mao nga problema.

Gusto sa mga kapitan nga himoan og lakang sa mga kompaniya nga tag-iya sa mga wire hinungdan nga nipadala na usab sila og suwat.

Ang ilang resolusyon ila nang gipadangat ngadto sa Talisay City Council.

“Murag law-ay na gyud ba,Bati na kaayo tan-awn nga nag bitay-bitay nanang mga wire dinha,” paghulagway ni Concial sa mga wire nga nangumbitay.

Matod niya nga maayo unta tagdon kini sa telecommunication ug utility companies pinaagi sa pagsusi.

“Halos diri sa low land, mao gyud ni ang problema namo sa mga barangay,” pagtin-aw ni Concial.

Ila kining gihimo nga lakang human ang Konseho sa Dakbayan sa Sugbo nihangyo sa mga telecom utility companies sa paghawan sa spaghetti wires sa siyudad.

Nagpadayon karon ang pagpanghawan sa mga spaghetti wire sa Dakbayan sa Sugbo ubos sa superbisyon ni Konsehal Jerry Guardo.

Giuna sa paghawan ang mga wire sa Sambag 1 ug 2 sa Dakbayan sa Sugbo.

Nanghinaut sila si Concial nga mao usab kini ang buhaton sa Dakbayan sa Talisay.

Pipila ka mga tuig ang nakalabay, usa ka lalake sa Dakbayan sa Talisay namatay human mabitik sa spaghetti wire samtang nagmaneho sa motorsiklo.

Duna say pipila ka mga aksidente nga gibasol usab sa mga rire nga nangumbitay sa karsada.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph