KRITIKAL ang kahimtang sa usa ka sakop sa task force sa merkado publiko sa Dakbayan sa Naga human gipusil sa riding in tandem Lunes sa alas 7:42 sa gabii, Agusto 31, 2020 sa may Barangay East Poblacion, Dakbayan sa Naga.
Si Timoteo Villarta, 51, minyo, taga Barangay Tinaan sa nahisgutang dakbayan, samdam sa walang bahin sa tiyan ug ulo.
Mga gunman nga wa mailhi sa kapulisan nagsakay sa enduro type nga motorsiklo, kolor blue.
Sa imbestigasyon sa kapulisan, si Villarta gikan sa ilang balay sakay sa multicab ug niadto sa iyang tindahan sa dapit.
Sa iyang pagkanaug sa sakyanan, nibutho ang gunman, gipusil si Villarta.
Way nakakita diin nipaingon ang gunman, apan dunay nakabantay nga nisakay kini sa motorsiklong naghuwat.
Ang biktima kasamtangang naa sa usa ka pribadong tambalanan sa dakbayan sa Sugbo.
Si Police Liieutenant Colonel Florendo Fajardo, hepe sa Naga Police Station nga nahinabi sa Superbalita Cebu, nagkanayon nga duha ka mga anggulo ang ilang gisubay.
Unang anggulo ang isyu sa yuta diin dunay wa makauyon niini nga ang isyu naabot na sa korte kay nagkinihaay.
Labot kini sa yuta sa mga kabanay sa iyang asawa nga iyang giahentihan.
Giingon nga dunay wa pagsinabtanay sa pamilya kalabot sa pagbaligya sa yuta.
Matod ni Fajardo nga ang ikaduhang motibo mao ang pagkasakop sa biktima sa Market Department Office sa Dakbayan.
Matod ni Fajardo nga sa nakuha nilang impormasyon, si Villarta manakop sa mga ambulant vendor isip kabahin sa Task Force Merkado ug istrikto.
Gibutyag ni Fajardo nga dunay mga panahon nga ipanglimbuwad ang mga tinda sa ambulant vendor.