UPAT ka tuig na ang milabay sa pagbusikad sa bomba sa Roxas Night Market nga mikutlo og ubay-ubay nga kinabuhi ug miangol sa daghan.
Dili pa dugay ang pagbusikad sa laing duha ka bomba didto sa Jolo, Sulu nga gibisita ni President Rodrigo Duterte ug mihalok sa dapit diin nabungkag ang lawas sa mga sundalo nga nahimong biktima sa suicide bomber.
Mga sundalo nga gibansay sa pagpakigsangka sa kaaway apan walay nahimo tungod lipot man ang nahitabo, diin walay bala sa ilang mga pusil ang napabuto nga gipunting sa mga kaaway.
Atong makita nga alang sa mga terorista, wala nay bili ang kinabuhi ug wala sa ilang hunahuna nga ang posibleng mahimong biktima sa ilang linuog nga buhat, mga tawo nga inosente ug mga batang gagmay.
Gani man, andam sila nga mobuhis sa ilang kinabuhi sa walay hinungdang buhat nga gipaluyohan sa yawan-on nga panghuna-huna diin ilang ikalipay ang kasakit sa uban.
Daghan pa ang susamang hitabo nga maoy misugnod sa atong mga magbabalaud nga ituboy ang Anti-terror Bill nga karon nahimo ng balaud, aron dili na masubli pa ang miaging panghitabo ug malikay ang katawhan.
Mga kritiko sa gobyerno nagpahigayon og mga rally kay alang kanila, paglapas kuno sa tawhanong katungod ang Anti-terror Law ug gamiton lang sa gobyerno sa paggukod sa mga kaatbang aron pahilumon bisan pa maghitak ang pag-abuso sa mga naa sa katungdanan.
Alang sa mga kabanay sa mga biktima nga mibatig kasakit sa samang hitabo, hugot ang ilang pagsuporta uban sa katawhan nga nagahatag og bili sa kinabuhi, kay bisan sa panahon nga lisud, ilang ginapaningkamutan nga magpakabuhi uban sa paglaum nga ugma damlag mahaw-as ra sila sa kalisud ug motagamtam sa kinabuhi nga haruhay.
Human sa pipila ka mga bulan nga sila mipahipi uban sa kalisud, andam na ang mga vendor nga mobalik sa pagpaninda sa kadalanan sa Roxas, andam bisan sa risgo nga ginaatubang kay sa gamay nilang kita, makapalit na sila og pagkaon alang sa panimalay, inay nga magsalig sa hinabang sa gobyerno nga gisaad karon apan wa pay klaro kanus-a matuman.
Nahigmata na ang mga Dabawenyo ug dili na buot nga tugawon pa ang kahapsay ug kalinaw sa dakbayan. Ang mga mata nahimong maigmat sa mga naa sa palibot, mga dagko o gagmay man nga makitang gibiyaan sa daplin nga posibleng maghatud sa kaalautan.
Atong hinumduman nga ang pagbantay sa atong palibot, boluhaton sa tanan, dili lang sa mga sundalo ug kapulisan tungod kung malambuon ang atong dakbayan mo epikto kini sa tanan.
Sa tinguha sa atong mayor nga ibalik ang dakbayan sa Dabaw sa kanhi nga kahimtang, atong duyogan uban sa mga mata nga maigmaton ug mapaniiron kay ang kasakit sa dakbayan, mahimong kasakit natong tanan.