NAGSUGOD na ang imbestigasyon sa National Bureau of Investigation (NBI)-Davao sa 90 ka mga affiliated hospitals sa Philippine Health Insurance
Corporation (PhilHealth), apil na mga doktor sa rehiyon, sa wala pa mibuto ang isyu sa Interim Reimbursement Mechanism (IRM) sayo niadtong Agosto ning tuiga.
Sa paghinabi uban kang Geraldo P. De Luna, NBI-Davao Special Investigator III, kinsa maoy gitahasan nga mo-imbestigar sa anomaliya sa PhilHealth, gibutyag niini nga ang NBI nakadawat og hangyo nga imbestigahan ang 90 ka ospital ug doktor niadtong Hulyo 11, 2019 gikan kang Ruben John A. Basa, kanhi chief operating officer (COO) ug executive vice president (EVP) sa PhilHealth.
Gibutyag ni De Luna nga ang ilang imbestigasyon atol niadtong panahona di "fast-tracked" tungod si kanhi PhilHealth president ug chief executive officer (CEO) Ricardo Morales daling mipadala og memorandum order ngadto sa tanang mga buhatan sa PhilHealth regional nga tanang mga hangyo nga mga dokumento gikan sa nahisgutang mga buhatan moagi sa ilang central office sa Manila.
Ang memorandum order gipetsahan og Septyembre, 2019.
Samtang ang PhilHealth-Davao nipasalig nga mopagawas og pahayag bahin sa maong memo sa di madugay.
Hinuon, gitin-aw ni De Luna nga ang maong mga kaso way kalambigitan sa IRM apan kasagaran mga "upcasing."
Pasabot og "upcasing" mao kanang mga doktor o hospital nga mag-upgrade sa diagnosis sa pasyente tumong nga makakuha og mas dako nga PhilHealth claims.
Pananglitan, kon ang pasyente nakasinati lang og komon lang nga sip-on o ubo, ang mga doktor o ospital mag-diagnose niini isip community acquired pneumonia tungod kay duna kini dakong kantidad nga benepisyo sa PhilHealth.
"Sa upcasing, wala namang makukuha ang doctor niyan kasi may fixed professional fee sila, so ang hospital lang (meron)," pagklaro ni De Luna.
Hinuon, dugang tin-aw niya nga human ang Senate inquiry sa isyu sa IRM sa PhilHealth ug mimugna og task force aron nga imbestigahan ang mga anomaliya sa buhatan sa Department of Justice, ang PhilHealth di na istrikto sa pagpagawas sa mga dokumento nga gikinahanglan alang sa investigating body.