BISAN pa man sa mga health protocol nga gipatuman sa Covid-19 pandemic, wala ni makapugong sa mga entrante sa labing unang Bisaya Quarantine Short Film Festival o “Quaranfilm Festival” aron mahatagan og kinabuhi ang ilang mga obra.
Mao ni ang gipabuhagay sa founding chairman ug managing director sa Cebu Young Talent nga si Johndro Sabuero bahin ning ilang pinakaagresibong programa karong tuiga sa natad sa kalingawan.
Ang Cebu Young Talent mag-pito na katuig karong Nobyembre 2020 diin lakip sa ilang mga kanhi talent mao silang Niel Murillo sa Pinoy Boyband Superstar ug ang singer nga si John Roa.
Ang “Quaranfilm Festival” gihimo sa Cebu Young Talent isip usa sa mga alternatibo nilang paagi aron malikay ang mga batan-on sa posible nga epekto sa quarantine sama sa depresyon.
Ang festival adunay lima ka mga short film entry nga gikan pa sa Argao, Naga, Minglanilla, Lapulapu ug Cebu City nga naghubit sa mga nagkadaiyang estorya sa pakigbisog atubangan sa nahitabo karong pandemya.
Ang maong mga short film ipasalida sa Cebu Catholic Television Network (CCTN-47) karong September 5 (1-2 pm) ug September 6 (2-3 pm) ug sa Facebook page sa Cebu Young Talent sa September 8. Nia ang uban pang mga detalye sa maong festival. Johndro Sabuero, Ssssuper Ka!
Giunsa ni pag-shoot nga quarantine man?
Ang Argao ug Naga nikuha sila og permiso sa ilang mga munisipyo. Samtang ang Minglanilla ug Cebu City gi-shoot nila ang mga scene sa tagsa-tagsa nila ka mga panimalay. Ang Lapu-Lapu gihimo nila ang ilang entry sulod sa pribadong subdivision nga dunay pagtugot sa homeowners. Ang tanang entry gihatagan og duha ka semana nga preparasyon, usa ka semana sa paghimo sa ilang estorya, usa ka semana nga shooting days ug duha ka semana sa editing.
Kinsa ang mga nangapil sa QuaranFilm Festival?
Mga ‘Bisaya Rising Influencer’, usa ka Facebook community nga giorganisar sad sa Cebu Young Talent nga mokabat na sa 3,000 ang mga miyembro. Samtang ang Festival Committee mao ang mga batan-ong Sugboanon nga silang Faiza Amerol (festival coordinator) sa Carcar, Ajet Cruda (festival graphics director) sa Naga ug Ken Martinez (video & visual director) sa Mandaue.
Kinsa ang mga hurado?
Silang Ronaldo S. Tan, ang Chairman sa Sinulog Short Film Festival, Professor Ligaya Rabago sa UP-Cebu, Theater ug ang komedyanteng si Betong Sumaya sa GMA7-Bubble Gang.
Kanus-a ianunsyo ang mga mananaug?
Sa September 10 via Facebook live streaming nga i-host sa among festival coordinator nga si Faiza Amerol.
Unsa ang mga premyo?
Gift packs sa Virginia Foods Inc. samtang ang best film makadawat og cash prize ug lechon belly gikan sa Cebu’s Original Lechon Belly courtesy ni Sir Marlon ug Ma’am Gladys Gochan.
Kanus-a nagsugod ang inyong quarantine activities?
Niadtong Mayo pinaagi sa online pageant nga “Mr. QuaranTeen Ambassador.” Gisundan ni sa Mr. & Ms. Bisaya Rising Influencer 2020, Bidaman Cebu season 1 ug season 2, Mobile Legend Tournament season 1 ug season 2, ug Call of Duty (COD) Tournament. Ang tanang mga partisipante nakadawat og cash prize ug giveaways.