KANHI barangay tanod nga usa ka na ka senior citizen girakrakan-patay sa duha ka mga lalake sulod sa Chinese Cemetery, Barangay Carreta, Dakbayan sa Sugbo, ala 1:30 sa hapon, Septiyembre 2, 2020.
Si Amelia Misa, 62, nagpuyo sa Proper Barangay Careta, kanhi tanod sa dapit, patay human nakaangkon og tulo ka samad pinusilan sa iyang lawas ug walang kamot.
Ang kapulisan nakarekuber sa crime scene sa tulo ka kabhang sa kakibre .45.
Si Major Dindo Alaras, hepe sa Mabolo Police Station nga nahinabi sa Superbalita Cebu, nagkanayon nga dunay 2 ka mga person of interest ang kapulisan nga ilang gipanid-an atol ning pagsuwat.
Giklaro niini nga ang biktima dili nila assets ug dako ang posibilidad nga gidudahan sa mga suspek nga asset sa kapulisan tungod sab kanhi tanod sa barangay. Matod pa niini nga ang biktima, gawas nga dunay kabanay nga naa sa sulod sa sementeryo duna sab kini payag diha sa sam-ang.
Walay nakakita sa pagpamusil, ingon man nakadungog og buto.
“Pusil nga dunay silencer ang gigamit sa duha ka mamumuno wala may buto nadungog nakit-an nalang ni siya nga nagbuy-od, gani makita ang samad sa kamot nga iyang gisagang,” dugang ni Alaras.
Si Alaras nipasabot nga ang biktima gidudahan nga asset sa mga nagduwa og ilegal nga negosyo sa maong dapit.
Kini human sunodsunod nilang drug operasyon sa maong lugar niadtong Sabado ug Dominggo diin daghang nangadakpan kanila.
Gipadayag niini nga nasuko ang mga mumuno hinungdan nga ang biktima maoy nadudahan nga mi-report sa pulis maong ilang gipusil.
Giawhag ni Alaras ang mga resident sa lugar nga mitaho sa kapulisan batok sa mga tawong nalambigit sa ilegal nga kalihukan aron mahimong dakong risgo ang ilang kinabuhi sa mga adik. (GPL)