GISAKMIT sa mga kawani sa Bureau of Customs (BOC)-Port of Cebu ang duha ka mga container sa gipayuhot nga mga sigarilyo nga giingong nagkantidad og P88.1 million sa Pier 6 niadtong Martes, Septiyembre 1, 2020.
Mao na kini ang ikatulong higayon nga nakasakmit ang maong buhatan og illegal nga shipment gikan sa usa ka importer sulod lamang sa duha ka semana.
Matod sa BOC-Port of Cebu, sa ilang opisyal nga pamahayag kagahapon, Miyerkules, Septiyembre 2, nga ang maong pinayuhot nga mga sigarilyo niabot sa Sugbo gikan sa China niadtong Agusto 8 ug 13 pinaagi sa duha ka managlahi nga shipments nga gipaka-aron ingnong nagdala lamang og mga payong ug home furnitures.
Base sa Inward Foreign Manifest, ang maong mga shipment naka-consign sa usa ka GRR Trading, samang importer sa una na nga nasakmit nila nga illegal ug misdeclared nga mga kargamento.
Matod sa BOC-Port of Cebu nga human sa usa ka coordinated profiling analysis nga gipahigayon sa Customs Intelligence and Investigation Service (CIIS), Enforcement and Security Service (ESS) and X-Ray Inspection Project (XIP) , giila ang maong mga container alang sa pagluwat og Pre-Lodgement Control Orders (PLCOs).
Human niini, nag-isyu dayon ang abogado nga si Charlito Martin Mendoza, Acting District Collector, og PLCOs sa mga shipment niadtong Agusto 28.
Niadtong Septiyembre 1, nagpahigayon ang mga assigned Customs examiners nga silang Alfredo Regidor Jr. ug Rochelle Arante og buwag nga complete physical examination kauban ang mga representante gikan sa CIIS, ESS, XIP, Philippine Drug Enforcement Agency, Philippine Coast Guard, ug Chamber of Customs Brokers Inc.—Cebu Chapter.
Nasakmit gikan sa una nga container ang 851 ka kaha sa Mighty cigarettes samtang 911 ka kaha sa Mighty, Fort, ug Marvel nga sigarilyo ang nasakmit usab sa ikaduha nga container.
Nag-isyu og warrants of seizure and detention si Mendoza batok sa maong mga shipment alang sa kalapasan sa Section 1113 (f), (i), ug (l) sa Republic Act No. 10863 kun Customs Modernization and Tariff Act niadtong Martes.
Niadtong Agusto 19, una na nga nakasakmit ang BOC-Port of Cebu og di mumenos sa 1,092 ka master cases sa smuggled Astro brand nga sigarilyo nga giingong nagkantidad og P54.6 million.
Paglabay sa unom ka mga adlaw kun pag Agusto 25, lain na usab nga mga smuggled nga mga sigarilyp nga adunay balor nga P92 million ang nasakmit.
Matod sa BOC-Port of Cebu, kining sunod sunod nga mga pakyas nga pagsuway sa pagpayuhot resulta sa mas gipanghingusgan nga border protection measures nga gibutang aron masumpo ang mga tawo nga nagpahimos karong panahon sa pandemya.
Gi-inagurahan sa Port of Cebu niadtong Hunyo ang usa ka Portal X-Ray Machine nga anaa na instalar sa Cebu International Port (CIP) dugang tabang sa pagpanglimbasog alang sa anti-smuggling drive.