5 bag-ong kaso sa Covid-19, 2 recoveries natala sa Oro

DUHA ka locally stranded individuals (LSIs), usa ka lokal nga kaso, usa ka lokal nga Authorized Person Outside Residence (Apor), ug usa ka returning overseas Filipino worker (ROF) ang mga bag-ong kumpirmadong kaso sa coronavirus disease (Covid-19) sa Cagayan de Oro human nagpositibo sila sa Sars-CoV-2.

Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 307.

Matud ni City Health Office Epidemiologist Dr. Joselito Retuya, ang tanan nga mga kaso nga ROF ug LSIs gidala dayon sa city isolation unit pag-abot sa dakbayan.

Ang ika-303 nga kaso usa ka 28 anyos nga babaye nga LSI gikan sa Manila ug residente sa Barangay Bulua. Miabot siya sa Cagayan de Oro pinaagi sa eroplano Agosto 26 ug gi-swab sa Agosto 31. Ang resulta migawas nga positibo sa Setyembre 1.

Ang babaye asymptomatic ug wala'y comorbidity.

Ang ika-304 nga kaso usa ka 34 anyos nga lalaki nga ROF gikan sa Japan ug residente sa Barangay Canitoan. Miabot siya sa Manila Agosto 21 diin siya gi-swab ug negatibo ang resulta.

Matud ni Retuya, nagpabilin siya sa usa ka hotel sa upat ka adlaw samtang naghulat sa resulta sa iyang swab test. Miabot siya sa Cagayan de Oro Agosto 25 ug gi-swab sa Agosto 29. Ang resulta migawas nga positibo sa Agosto 31.

Gikatakda nga ibalhin siya sa Temporary Treatment and Monitoring Facility.

Ang ika-305 nga kaso usa ka 22 anyos nga lalaki nga LSI gikan sa Cebu ug residente sa Barangay FS Catanico. Miabot siya sa Cagayan de Oro pinaagi sa pagbiyahe sa dagat Agosto 26.

Ang lalaki gi-swab Agosto 31 ug ang resulta migawas nga positibo sa Setyembre 1. Siya asymptomatic ug wala’y comorbidity.

Ang ika-306 nga kaso usa ka 37 anyos nga babaye nga lokal nga Apor nga nagpuyo sa usa ka gated community sa Barangay Gusa. Miabot siya sa Cagayan de Oro Agosto 6 ug nag-duty sa Agosto 11 sa usa ka pasilidad sa Misamis Occidental.

Mibalik siya sa Cagayan de Oro sa Agosto 14. Matud ni Retuya, nakasinati siya og throat discomfort sa Agosto 17 ug adunay sip-on ug stuffy nose sa Agosto 19. Paglabay sa duha ka adlaw, gihilantan ang babaye ug nagkasinati og uban pang simtomas sama sa loss of smell ug loss of taste.

Ang babaye nagpaubos sa self-isolation hangtod sa Agosto 30 ug gi-swab sa mao nga adlaw. Ang resulta migawas nga positibo sa Agosto 31. Wala siya'y comorbidity ug gikatakdang ibalhin sa Temporary Treatment and Monitoring Facility.

Matud ni Retuya, ang close contact sa babaye mao ang iyang kapikas nga gi-swab sa Northern Mindanao Medical Center (NMMC) ug negatibo ang resulta. Ang uban pa niyang close contact mao ang iyang mga in-laws nga naa sa Iligan City.

Ang ika-307 nga kaso usa ka 51 anyos nga babaye nga residente sa usa ka gated community sa Barangay Lumbia. Gi-admit siya sa usa ka pribadong ospital.

Giingon ni Retuya nga ang 51 anyos nga babaye adunay history of travel kauban ang iyang bana sa usa ka munisipyo sa Misamis Oriental diin sila nagpabilin sa usa ka bulan.

Ang babaye adunay hilanat, sakit sa ulo, loss of appetite ug loss of taste sa Agosto 26. Gi-swab siya sa usa ka pribadong pasilidad sa Agosto 31 ug ang resulta migawas nga positibo sa Setyembre 1.

Siya symptomatic ug adunay comorbidity. Gibalhin siya ug karon gi-admit sa NMMC.

Sa pagkakaron, adunay 118 nga mga pasyente nga nagpositibo sa Covid-19 ang nagpabilin sa Temporary Treatment and Monitoring Facility, sumala ni Retuya.

Sa 118 nga pasyente, 90 niini ang mga residente sa Cagayan de Oro ug 28 ang mga dili residente sa dakbayan.

Nakatala usab ang City Health Office og duha ka mga pasyente nga positibo sa Covid-19 nga karon gi-tag nga "recovered" human ang resulta sa ilang repeat swab migawas nga negatibo sa Setyembre 1.

Ang mga naka-recover mao ang usa ka 31 anyos nga babaye nga ROF ug residente sa Barangay Lapasan; ug usa ka 22 anyos nga babaye nga lokal nga Apor ug residente sa Barangay Indahag.

Ang Cagayan de Oro adunay 90 ka mga active cases, diin upat niini na-admit sa NMMC, 32 ang mga outpatients ug 54 ang mga ROFs/LSIs.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph