BALHOG na sa selda sa Sta. Ana Police Station ang suspek nga misunog sa ilang balay ug midamay sa 60 ka mga kabalayan alas 2 kagahapon sa kaadlawon, Septyembre 3, didto sa Sto. Niño, Gotamco, Barangay Leon Garcia, Agdao District, Davao City.
Sumala ni Sta. Ana police station commander Police Major Michael Uyanguren nga ilaha dayong nasikop ang suspek nga si Roberto Linggasac Manalong, 44 anyos.
Pinaagi sa follow-up operation sa operatiba sa Sta. Ana police, nasikop ang suspek ug nasayran nga gibuboan sa suspek og gasolina ang ilang salog dayon gisindihan og lighter atol sa ilang panag-away sa iyang asawa.
"Away mag-asawa," sulti ni Uyanguren sa Superbalita Davao.
Gisulayan og hinabi sa Superbalita ang suspek apan nagdumili pa kini sa pagtubag kagahapon sa buntag, Septyembre 3.
Sa maong hitabo, nasunog sab og apil ang pipila ka mga classroom sa Congressman Manuel Garcia Elementary School nga kasikbit ra sa mga kabalayan sa dapit.
Mokabat sa P1 milyon ang damyos sa maong sunog subay sa inisyal nga pagbana-bana sa imbestigasyon sa Davao City Fire District.
Hinuon, walay nakabsan og kinabuhi sa hitabo apan dunay nakahiagom og mga pangos nga mga residente dihang nagdali-dali sila sa pagsalbar sa ilang nga gamit.
Sa kasamtangan, giandam na ang patong-patong nga kasong arson nga ipasaka batok sa suspek didto sa korte, samtang ang mga naapektuhan sa sunog giabagan na sa taga City Social Welfare and Development Office sa Dakbayan sa Davao.