SUPERBALITA CEBU

Brix Flores gym miabli na'g balik

GIKALIPAY ni boxing trainer ug kanhi miyembro sa Philippine national team nga si Crisologo “Brix” Flores ang pagbalik sa boksing human sa lima ka mga buwan nga pagkahunong niini tungod sa hulga sa coronavirus disease 2019 (Covid-19).

Si Flores, kinsa maoy trainer ug tag-iya sa Brix Flores Boxing Gym nga nahimutang sa Mandaue City, mibalik na sa paggiya sa iyang mga professional boxer.

Bisan dili pa fully-operational ang gym ug ang training sa mga boksidor, mas maayo nalang kini kay sa mga milabay nga buwan nga wala lihok ang mga atleta, matod ni Flores.

“Nalipay ko kay nibalik na og bisan dili pa normal at least nakasugod na ta,” ingon ni Flores sa interbiyu sa Superbalita.

“Matagaan na’g chance nga maka-kwarta ang boxers, trainers, judges, officiating ug mga tao nga involve sa boxing,” asoy ni Flores.

Ang Brix Flores Boxing Gym usa sa mga tinahod nga gyms sa Sugbo.

Diri naumol ang abilidad sa mga kampiyon sama nila Malcolm “Eagle Eye” Tunacao, Noel “The Eel” Tunacao, Rodel “Batang Mandaue” Mayol ug managsuong Elmer ug Eriberto Gejon.

Ang magsuong sila si Edito ug Edmund Villamor nahilakip sab sa mga boksidor sa gym kaniadto ubos sa paggiya ni Paciano “Noy Pacing” Flores, amahan ni Brix.

Andam ang Brix Flores Boxing Gym nga modawat kon adunay boxing promoter nga mo-kontak kanila alang sa usa ka fight card.

“May gani nabalik na kay naa nay mga mo-promote pareha aning Omega (Omega Pro Sports International). Pero wala pay duwa ang akong boxers kay walay pareha og timbang sa ilang boxers,” matod niya.

Ang mga boksidor sa Brix Flores gym nanguli sa ilang probinsiya kay nakanselar man ang mga away niini sa Maynila ug Mindanao.

“Karon naay mga ning-ari nga boxers mao ako gi-train. Mga taga Mandaue City ra sila kay ang uban nako nga boxers nga naa sa province sama sa Leyte wala pa man makabalik,” ingon ni Brix.

Si Flores miingon nga ilang sundon ang guidelines nga gihatag sa IATF alang sa training sa pro boxers. Iyang gipasabot nga sa pagkakaron wala pa’y sparring nga nahitabo.

“Mosunod gyud mi sa guidelines sa IATF when it comes to practice ug kon naa na pud fight. Conditioning lang sa mi karon, wala pay sparring,” pagtino ni Brix.

Ang IATF mitugot nga makabalik og training ang pro boxers sa mga lugar nga dili na taas ang hulga sa Covid-19 sama sa tibuok Sugbo ug Region 7 nga gibutang na karon sa Modified General Community Quarantine (MGCQ).


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph