PITO ka mga bag-ong kaso sa coronavirus disease (Covid-19) ang nadugang sa Cagayan de Oro human nagpositibo sa Sars-CoV-2 ang lima ka mga lokal nga kaso ug duha ka mga localy stranded individuals (LSIs).
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 314.
Matud ni City Health Office Epidemiologist Dr. Joselito Retuya, ang duha ka LSIs gidala sa city isolation unit pag-abot nila sa Cagayan de Oro.
Ang ika-308 nga kaso usa ka 26-anyos nga lalaki nga LSI gikan sa Cebu ug residente sa Barangay Macabalan. Miabot siya sa Cagayan de Oro pinaagi sa pagbiyahe sa dagat Agosto 26.
Ang lalaki gi-swab Agosto 31 ug ang resulta migawas nga positibo sa Septiyembre 2. Siya asymptomatic ug wala’y comorbidity. Gikatakda siya nga ibalhin sa Temporary Treatment and Monitoring Facility.
Ang ika-309 nga kaso usa ka 32-anyos nga lalaki nga LSI gikan sa Manila ug residente sa Barangay Bonbon. Miabot siya sa Cagayan de Oro pinaagi sa eroplano Agosto 26 ug gi-swab Agosto 31. Ang resulta migawas nga positibo sa Septiyembre 2.
Ang lalaki asymptomatic ug wala'y comorbidity.
Ang ika-310 nga kaso usa ka 51-anyos nga lalaki nga residente sa Barangay Kauswagan. Matud ni Retuya, ang lalaki niadto sa usa ka munisipyo sa Misamis Oriental sa ikatulong semana sa Agosto.
Ang lalaki adunay sip-on, ubo, ug hilanat sa Agosto 27. Sa Agosto 31, nagpa-laboratory exam sa usa ka pribadong ospital. Sa Septiyembre 1, siya gi-x-ray ug gi-swab. Ang resulta migawas nga positibo sa Septiyembre 2.
Hypertensive siya ug kasamtangan nagpabilin sa Temporary Treatment and Monitoring Facility.
Nailhan sa City Health Office ang 18 ka mga direct contacts, lakip ang kapikas sa lalaki ug tulo nila ka mga anak. Naa sila karon sa city isolation unit.
Ang ika-311 nga kaso usa ka 56-anyos nga lalaki nga residente sa Barangay Lumbia. Matud ni Retuya, ang lalaki adunay sip-on, ubo ug hilanat sa Agusto 24. Miadto siya sa usa ka pribadong klinika sa Carmen para magpakonsulta. Nagpa chest x-ray usab siya sa usa ka pribadong diagnostic laboratory.
Ang resulta sa x-ray nagpakita nga ang lalaki adunay pneumonia. Sa Septiyembre 1, niadto siya sa Northern Mindanao Medical Center (NMMC) ug sa Septiyembre 2 siya gi-swab. Ang resulta migawas nga positibo sa gabii sa Septiyembre 2.
Ang 56-anyos nga lalaki, sa karon, asymptoamtic ug wala’y comorbidity. Nailhan sa City Health Office ang siyam nga direct contact sa lalaki.
Ang ika-312 nga kaso usa ka 25-anyos nga babaye nga lokal nga Authorized Person Outside Residence (Apor) nga nagpuyo sa Barangay Patag. Ang babaye usa ka healthcare worker sa NMMC, ingon ni Retuya.
Ang babaye adunay sip-on ug ubo sa Agosto 30 ug sa Agosto 31 siya gihilantan. Gi-swab siya sa Septiyembre 2 sa NMMC ug migawas nga positibo ang resulta sa gabii sa maong adlaw.
Giadmit siya sa NMMC Septiyembre 3. Nailhan sa City Health Office ang duha ka mga direct contact sa babaye.
Ang ika-313 nga kaso usa ka 38-anyos nga babaye nga residente sa Barangay Nazareth. Si Retuya miingon nga ang babaye usa ka trabahante sa BPO, working from home kaniadtong Marso 2020.
Nanganak ang babaye sa Septiyembre 1 sa usa ka pribadong ospital diin siya gi-admit. Nagpakita siya og mga sintomas sa Agosto 20. Gi-swab siya sa Septiyembre 1 ug ang resulta migawas nga positibo sa Septiyembre 2.
Nailhan sa City Health Office ang lima ka direct contact, diin tulo niini mga anak sa babaye ug ang duha mga senior citizens. Tanan sila naa karon sa city isolation unit.
Ang ika-314 nga kaso usa ka 36-anyos nga babaye nga lokal nga Apor nga nagpuyo sa Barangay Indahag. Ang babaye usa ka magtutudlo nga woking from home, ingon ni Retuya.
Siya adunay hilanat, ubo ug sore throat sa Agosto 28. Nanganak siya sa Agosto 31 sa usa ka pribadong ospital. Gi-swab siya sa parehas nga adlaw ug sa Septiyembre 2, positibo ang resulta.
Ang 36-anyos nga babaye wala’y travel history. Naa siya karon sa Temporary Treatment and Monitoring Facility.
Nailhan sa City Health Office ang tulo ka mga direct contacts sa babaye.
Sa Septiyembre 2, nakatala ang Cagayan de Oro og 86 ka mga active cases, diin ang duha niini giadmit sa NMMC, 33 ang outpatients ug 51 ang mga ROFs/LSIs.