RETIRADONG pulis nipusil patay sa iyang silingan nga iyang gikasuk-an kay gibadlong siya sa pagduwag mahjong sa Miyerkules, Sepityembre 2, 2020 sa Sitio Riles Barangay Poblacion, lungsod sa Sibonga.
Si Sergio Villapania, 63, minyo, dead-on-arrival (DOA) sa tambalanan sa lungsod sa Sibonga human nakaangkog daghang mga samad pinusilan sa kalawasan.
Nitahan sa Sibonga Police si Retired SPO1 Randolph Rivera, 65, minyo.
Si Police Master Sergeant Hubert Pananganan, imbestigador sa Sibonga Police Station nga nahinabi sa Superbalita Cebu, nagkanayon nga sila si Villapania ug Rivera nagkalalis nianang buntag sa Miyerkules.
Natandog ang garbo ni Rivera nga gibadlong siya sa pag-mahjong ug dihang nakainom pagkahapo,n iyang gikakomprontase si Villapania.
Matod ni Pananganan nga si Villapania nagbagis sa kawayan alang sa iyang tangkal sa manok.
Giduol siya ni Rivera ug gidapog ang ulo. (GPL)