MALAMPUSON ang pag-opera aron pagkuha sa bato sa apdo ni Cebu City Mayor Edgardo Labella sa Huwbes, Septiyembre 3, 2020.
Kini human gianunsyo ni Labella nga adunay nakitang mga bato sa iyang apdo sa pantog ang iyang mga doctor dihang nagpaubos siya sa eksaminasyon pipila ka mga buwan ang nakalabay.
Ang kapikas ni Labella nga si Joy, kinsa maoy katambayayong sa mayor sa private hospital, nagkanayon nga nilanat og kapin o kulang 30 minutos ang operasyon sa mga doctor. Iyang gihulagway nga nagpahulay na ang mayor ug gikatakdang mogawas karong adlawa, Septiyembre 4, gikan sa tambalanan si Labella.
Ang pamahayag sa asawa sa mayor gidasonan usab kini sa Facebook post ni Edgardo “JP” Labella II, ang kamaguwangan nga anak sa mayor.
“Daghang salamat mga minahal namo nga Sugboanon sa inyong mga pag-ampo sa kalampusan sa operasyon sa atong pinalanggang amahan sa Syudad sa Sugbo, Mayor Edgar Colina Labella,” matod sa post sa batan-ong Labella.
Nalangay ang pagpa-opera ni Labella sa iyang gall bladder stone sanglit ang Cebu City gipaubos pa sa enhanced community quarantine , modified ECQ hangtod na sa general community quarantine (GCQ) niadtong panahona ug subsob ang ilang pagpangandam batok sa coronavirus disease (Covid-19).
“Managing Cebu City’s response against COVID-19 had been such a challenging task that I brushed aside the stomach and joint pains that I have been experiencing. After undergoing a thorough health check earlier and in the interest of transparency and good faith, I would like to inform everyone that I was diagnosed with gallbladder stones and will be due for surgery tomorrow morning,” tipik sa Facebook post sa mayor niadtong Septiyembre 3, 2020.
Samtang wa si Labella kay on leave, si Bise Mayor Michael Rama maoy acting mayor sugod sa Septiyembre 3, pahibawo sa tigpamaba sa mayor, Mobalik siya og trabaho sa Septiyembre 5. (PAC)