DAVAO DEL NORTE -- Nagpadayon pa ang gihimong retrieval operation sa lokal nga panggamhan sa Sto. Tomas ning probinsiya sa tinguha nga maugkat ang upat ka tawo giingong treasure hunters nga nalubong sa yuta niadtong Dominggo, Agosto 30, 2020.
Sa pakighinabi sa Superbalita Davao kang Vice Mayor Erick Stella sa lungsod, gibutyag niini nga wa pa igkita ang mga biktima nga sila Gerick Marquez, 23; Rustom Rancho, 18; Dindo Panares, 18; ug Kyl Castanes, 18, nga giingong natabunan ilawom sa yuta nga ilang gikubkob nga dunay gilawmon nga 96 ka tiil.
Dugang sa bise alkalde nga gibutangan og troso sa lubi ang kilid sa bangag nga nakalot sa backhoe aron magsilbing suporta nga dili modahili ang yuta nga gikabkab nga miabot na sa gilawmon nga 30 ka tiil.
Ang Incident Management Team (IMT) Engineering Team sa lungsod nga maoy nanguna sa nagpadayong retrieval operation nanginahanglan og dugang 30 ka mga punoan sa lubi aron magamit sa pagpalig-on sa yuta ug dili na mahugno sa padayong pagkubkob.
Hinuon, gisulti ni Vice Mayor Estella nga duna nay mi-donate og punoan sa mga lubi nga magamit sa operasyon.
Matud pa nga mapasakahan og kaso ang mga tawo nga giingon nag-"finance" sa treasure hunting.
Apan butyag ni Stella nga asikasuhon una nila ang pagpangita sa lawas sa upat ka mga giingong treasure hunters nga nalubong buhi ilawom sa yuta. (Dexter T. Visitacion)