GIPASAKA na didto sa korte ang kasong arson batok sa suspek nga misunog sa ilang balay ug midamay og dul-an 60 ka mga balay, Septyembre 3, didto sa Sto. Niño, Gotamco, Barangay Leon Garcia, Agdao District, Davao City.
Sumala ni Sta. Ana Police Station commander Police Major Michael Uyanguren nga ila nang nadala ang suspek nga si Roberto Linggasac Manalong, 44 anyos, didto sa City Prosecutor's Office (CPO) aron mapasaka ang kasong arson.
"Yes, atong napasaka na ang kasong arson batok sa suspek didto sa CPO," ingon ni Uyanguren.
Sa maong hitabo, nasunog sab og apil ang pipila ka mga classroom sa Congressman Manuel Garcia Elementary School nga kasikbit ra sa mga kabalayan sa dapit.
Mokabat sa P1 milyon ang damyos sa maong sunog subay sa inisyal nga pagbana-bana sa imbestigasyon sa Davao City Fire District.
Ang City Social Welfare and Development Office nagpadayon sa pag-validate sa mga biktima alang sa ayudang pinansiyal gikan sa lokal nga kagamhanan. (Jeepy P. Compio)