HUMAN sa pagbutang og bike lanes, butangan usab kini og protection barriers sa gobyerno sa Dakbayan sa Mandaue.
Kini subay sa panawagan sa Department of the Interior and Local Government (DILG) sa mga lokal nga kagamhanan nga magbutang og protective barriers sa bike lanes.
Matod ni John Eddu Ibañez, executive secretary ni Mandaue City Mayor Jonas Cortes, nga bisan sa wa pa ang memo sa DILG, aduna nay plano ang Dakbayan nga magbutang og protective barriers sa bike lanes.
Gani, gitun-an na sa Mandaue City Planning asa angstrategic nga mga dalan ang angay nga butangan og protective barriers.
Gilaraw nga butangan og protective barriers ang bike lanes sa Barangay Centro, sa North Reclamation Area ug uban pang kadalanan nga adunay daghang mga sakyanan.
Matod ni Ibañez, ang protective barriers mamahimong pahinumdom sa mga motorista nga ang bike lanes eksklusibo ra sa mga nagbisikleta.
Maawhag usab niini ang mga first timer bikers nga mogamit sa bike lanes tungod kay ilang masinati nga sila mas luwas gikan sa laing mga sakyanan ug layo sa aksidente.
Gigahinan na sa Traffic Enforcement Agency of Mandaue (Team) og badyet ang materyales alang sa protective barriers.
Matod ni Ibañez nga ang pangulo sa Team si Jammal Calipayan, gipaniguro nga ang mga materyales nga paliton alang sa protective barriers barato lang. Dugang pa niya nga adunay na silay disenyo nga gamit lang mga plastik nga tubo sa PVC, semento ug mga pisi. Kon mahuman na ang study, karong hinapos sa Septiyembre masugdan na ang pagbutang sa barriers, sigon ni Ibanez.
Sa laing bahin, bisan kon ang Dakbayan nagbutang og mga bike lane, adunay gihapoy mga motorista nga mogamit gihapon sa mga bike lane aron maka-park o maka-overtake.
Matod ni Ibañez nga ang mga traffic enforcer sa Team nagpatuman sa mga sumbanan sa saktong paggamit sa mga bike lane ug badlongon o isyuhan nila og citation ang mga nakalapas.
Aron mapalig-on usab ang mga sumbanan, gihangyo ni Ibañez si Konsehal Jimmy Lumapase, nangulo sa committee on transporation sa Konseho, nga maghimo og usa ka eksklusibong ordinansa alang sa saktong paggamit sa bike lane ug adunay atubangon nga silot ang mga nakalapas niini. / KFD