PHILIPPINE Drug Enforcement Agency (PDEA 7), inabagan sa kapulisan sa Central Visayas, nakasakmit og P135.4 million nga balor sa illegal nga drugas sulod lang sa 76 ka adlaw.
Kini sukad sa pag-asumer ni Director Levi Ortiz kaniadtong Hunyo 20 sa liderato sa agency.
Sa talaan sa PDEA-7, nakasakmit na silag kapin sa 17 kilos sa gituohang shabu nga mobalor oga P114.4 million samtang 52 kilos sa marijuana ang ilang naibot nga nagkantidad og P20.9 Million.
Matod ni Ortiz nga ang pagkasakmit sa illegal nga drugas gitambayayungan sa kapulisan sa Central Visayas pinaagi sa intelligence monitoring ug anti drug operation.
Ang labing dako nga ilang nasakmit kadtong kapin sa 10 ka kilo sa gituohang shabu nga namatikdan sa ilang K9 unit nga gipaagi sa usa ka courier nga nahimutang sa Siyudad sa Mandaue.
“Ang reason man gud nga daghan tag confiscation kay gipanghingusgan gyud nato ang atong anti drug operation. Our agents have high morale, professionally trained and dedicated ug nanarbaho gyud. And at the same time, nindot ang atong relation sa PNP, ang atong information sharing. So, daghan tag nakuhang information,” matod ni Ortiz.
Gibutyag ni Ortiz nga ang supply sa illegal nga drugas sa Central Visayas gikan pa gihapon sa kaulohan. Ang mga nasakmit sa Luzon susama og packaging sa nakuha dinhi nga gisulod og Chinese tea bag.
Matod sa PDEA 7 director, tungod sa kadaghan sa entry points sa Sugbo, sayon ra nga makasulod ang supply sa illegal nga drugas, apan gihingusgan na nila kini uban ang kapulisan.
ANTI DRUGS
Si Police Brigadier General Albert Ignatius Ferro, hepe sa kapulisan sa Central Visayas, nipahibawo usab nga ning paglugak na sa quarantine level sa siyudad ug lalawigan sa Sugbo, magpadayon ang ilang subsob nga kampanya batok sa illegal nga drugas sama sa unang adlaw sa iyang pag lingkod isip pangulo sa PRO 7 niadtong Pebrero 6.
Kapin sa unom ka buwan nga pamunoan ni Ferro nakasakmit na sila og kapin sa 59 ka kilo sa gituohang shabu nga mokantidad ang tanan sa og kapin sa P400 Million.
Gawas sa illegal nga drugas, hingusgan usab ni Ferro ang kampanya batok sa ubang matang sa kriminalidad sama sa illegal gambling ug uban pa.
Di molugak ang kapulisan ilabi na nga mibalik na usab sa normal ang kinabuhi sa mga tawo bisan kon aduna pay naghulga nga virus.