GITIGOM ni Lapu-Lapu City Mayor Junard “Ahong” Chan ang mga motorbanca operators ug boatmen sa isla sa Olango sa Biyernes, Septiyembre 4, 2020 aron maandam sila sa pagbukas na pagbalik sa turismo sa dakbayan.
Lakip sa nahisgotan sa tigom mao ang pagsunod sa health protocol nga gilatid sa Inter Agency Task Force (IATF) nga 50 porsyento ra sa kapasidad sa motorbanca ang masakyan sa mga turista.
Kon sa una mokarga ang usa ka motorbanca og 40 ka tawo, karon 20 na lang o ubos pa niana, sumala ni Chan ngadto sa mga operator ug boatmen.
Kini aron masiguro nga masunod ang physical distancing nga gilatid ubos sa modified general community quarantine (MGCQ).
Gumikan kay limitado ang pasahero, sabotan pa sa kagamhanan ug operators ang uniform, mga pletihan unya alang sa mga turista nga gustong mopahigayon sa island hopping.
Laing nasabotan atol sa panagtigom mao nga kinahanglan mopaubos sa swab test ang tananag operators ug boatmen una sila tugotang makadawat na og mga turista.
Ang kagamhanan maoy moabaga sa galastuhan kalabot niini una pa sila tagaan og certificate nga maka-operate.
Tagaan usab og vitamin C ang mga motorbanca operator ug turokan og flu vaccine aron masiguro ang kaluwasan sa mga turista.
Gawas sa certificate sa kagamhanan, kinahanglan usab sila mangayo og permit sa Maritime Industry Authority (Marina-7).
Apan gumikan kay nakasabot si Chan nga way kwarta o igong pundo ang uban nga makalukat dayon niini, plano niyang mosuwat sa Marina-7 nga lugwayan ang pagkuha og permit sa ilang buhatan hangtod sa sunod tuig.
Aron usab kalikayan ang pagkatap sa Covid-19, idili na ang pag puli-puli og snorkel sa mga turista nga mopahimus sa island hopping.
Tanan giawhag sa pagpalit sa ilang kaugalingon ug ang tanang operators giawhag sa pagtinir og baligya nga snorkel aron makapalit ang turista nga wa makadala sa iyang kaugalingon.
Napanglantawan ni Chan nga usa unya sa bag-o nilang atraksyon sa isla mao ang dolphin watching sanglit sa iyang pagbiyahe paingon sa isla, aduna siyay nasigpatan nga dolphin mga alas 9:30 sa buntag.
Iya kining patun-an ug paobserbaran aron di na kini mohawa sa lugar pinaagi sa paghatag unya niini og pagkaon.
“Ang turismo mao gyud ang naghatag nato og kinabuhi sa atong syudad. Mao nga ang Siyudad kanunay nagasuporta ug nagatan-aw sa panginabuhi sa atong kaigsuonan,” matod ni Chan.