KALBARYO ang nasinati sa 14 ka mga pamilya nga gilangkuban sa di mominos 40 ka mga tawo sa usa ka sityo sa Barangay Cogon Pardo, Siyudad sa Sugbo.
Kini human sila nakabilar og kabanay ug silingan nga namatay sa usa ka sakit, apan positibo usab diay sa coronavirus disease (Covid-19).
Uwahi na niabot ang resulta sa swab test sa Cebu City Health Department kay nahaya ug nabilaran na sa iyang mga kabanay ug silingan.
Diha na mahibaw-i ang kaso sa 60 anyos nga lalakeng namatay dihang gipahibawo ang barangay officials sa Cogon Pardo nga nag-contact tracing na.
Matod ni Cogon Pardo Barangay Captain Harry Eran nga siya nitugot nga mahaya ang 60 anyos kay naa sa death certificate nga ang namatyan niini sakit sa kasingkasing.
Apan nakugang si Eran dihang gipahibawo sa CHD nga ang namatay positibo sa Covid-19 base sa ilang swab test.
Ang mao nga lalake namatay niadtong Agusto 29, 2020 sud sa usa ka tambalanan sa kagamhanan dinhi sa Dakbayan sa Sugbo.
Nakabutang sa death certificate nga acute myocardial infarction ang namatyan sa pasyente, di Covid-19.
Ang certificate gipirmahan sa usa ka doktor sa Vicente Sotto Memorial Medical Center, kansang kadagkuan nagsusi na sa hitabo.
Gipugngan una sa Superbalita Cebu ang ngan sa doktor samtang wa pa makuhai sa iyang habig.
“Atong gihatagan og pagtugot kay duna may mga certificate nga nagpamatuod ang namatay, dili sakit nga Covid,” sulti ni Eran sa Superbalita Cebu.
Dugang ni Eran nga sa Septiyembre 1, usa ka adlaw sa wa pa gilubong, sila gitawgan sa CHD nga duna silay residente nga namatay nga positibo sa Covid-19.
“Ako dayon gipalakaw ang among contact tracing ug nianang adlawa, gi swab test dayon sila nga mga pamilya,” nagkanayon si Eran.
Di moubos sa 40 ka mga tawo o dunay 14 ka pamilya ang gipaubos sa swab test ug gi-quarantine sa ilang tagsa ka balay.
Iya kining gipabantayan sa mga barangay tanod aron way makagawas sa ilang mga balay.
Lakip sa ilang gi swab test ang mga kabanay niini sa duha ka mga barangay sa Dakbayan sa Sugbo.
Di hinuon ang tibuok sityo ang ilang gi-lockdown.
EMBALMER
Samtang apil sa 40 ang gi-swab test ug gi-quarantine ang duha ka mga embalmer sa usa ka komersyal nga purenarya nga maoy nag-embalsamar sa namatay nga tiguwang.
Matod sa manager sa purenarya nga si Lyn-lyn (ngan gipugngan) nga wa sila magdahum nga kini mahitabo.
Ang purenarya giisyuhan og deceased retrieval form sa tambalanan nga ang gikamatyan sa tiguwang di Covid.
Ang usa sa mga apo sa namatay nga di magpahingan nasagmuyo sa nahitabo sa iyang apohan.