NIPASALIG si Naga City Mayor Kristine Vanessa Chiong nga mahatagan gihapon og pagtagad ang pagpadayon sa giplano nga mga proyekto sa syudad sama sa infrastructure, taytayan ug pag improve sa health system ug edukasyon taliwa ning nasinati nga krisis gumikan sa pandemya sa coronavirus disease (Covid-19).
Mao kini ang gipasalig ni Chiong atol sa State of the City Address (SOCA) sa paghandom sa pagkadakbayan sa Naga sa Septiyembre 5, 2020.
Hugot nga pagpatuman sa quarantine protocol ug paspas nga response batok Covid-19 patients ang labing una nga gihisgutan ni Chiong.
Base sa datos sa syudad sa Septiyembre 5, niabot og 25 ka aktibo nga kaso sa Covid ang natala niini. Samtang 195 ang kinatibuk-an nga nataptan sa sakit.
Matod ni Chiong nga bisan kon nilapas sa 100 ang nataptan sa sakit, nakaabot man usab og 71 porsyento nga recovery rate ang syudad.
Matod ni Chiong nga sa pagsulbong sa Covid sa lalawigan sa Sugbo ug gipaubos sa enhanced community quarantine (ECQ) ang dakbayan, wa mohunong ang Siyudad sa paghatag og relief assistance sa 36,000 ka mga panimalay sa 28 ka mga barangay.
Aron mapugngan ang pagkatap sa kagaw, gipahugtan usab sa syudad ang border control ilabi na nga ang silingang dakbayan sa Talisay ug lungsod sa Minglanilla dunay taas nga mga kaso sa Covid sulod sa lima ka buwan.
Mipatuman usab og granular lockdowns ang syudad, pagpatuman og curfew, liquor ban, scheduled nga pag merkado ug disinfection.
“While dili ko makasaad nga dili na mapun-an ang atong kaso especially karon nga ni ease naman ang atong restrictions and some activities are already allowed during the MGCQ status, maka expect mo sa inyong City Government nga magpadayon nga ko trabaho taliwala sa hulga sa covid-19,” matod ni Chiong.
Nanawagan usab si Chiong nga bisan paman og gipaubos na sa MGCQ ang syudad, mahimong responsabli ug mabinantayon ang mga konstituente aron makab-ot ang mga plano sa kalambuan.
“Moving forward the city government is focused now in its immediate goal to strike a balance between safety and opening up our city so our workers and business owners can resume their livelihood with discipline, community cooperation and vigilance in the observance of minimum health and safety standards as important safety nets. Clearly we each have a role in overcoming the ill effects of months of quarantine restrictions and we must do our part...,” matod ni Chiong.
EDUKASYON
Gawas sa Covid-19 response, moabot sa 844 ka mga scholar ang padayon nga gisuportahan sa Siyudad alang sa pagbukas sa klase sa 2020-2021.
Moabot sa 1,202 ka mga magtutudlo ug 390 ang mahatagan og libre nga pocket wifi ug pagbukas sa 50-seat capacity nga public library kon diin adunay libreng internet connection nga magamit sa mga tinun-an.
Gihan-ay na usab sa Siyudad kauban sa tabang sa Department of Education (DepEd) ang pag apod-apud sa mga modules sa 30,000 ka mga tinun-an matag semana.
Bisan sa pandemya, nisaad si Chiong sa padayon nga paghatag niini og pundo sa mga barangay aron nga makapadayon sa mga proyekto ig programa nga gisugdan.
Aron mahimong sayon ang pag agi sa mga supply ug sa mga Nagahanon, duha ka mga taytayan ang gikatakda nga himuon sugod sa barangay Mainit ug ang ikaduha sa barangay Lutac.