BISAN sa hagit nga atubangon sa panahon sa pandemya, nagsugod na sa pag-house-to-house ang enumerators sa Philippine Statistics Authority (PSA) sa dakbayan sa Mandaue.
Nagsugod sila sa pag-house to house niadtong Huwebes, Septiyembre 3, 2020 ug kinahanglan kini nila nga matigom ang tanang impormasyon sulod sa 25 ka adlaw.
Matod ni Vic Suliva, census area supervisor sa dakbayan sa Mandaue, nga nagdoble sila og amping sa ilang pagpahigayon sa house-to-house tungod dako kini nga risgo labi na sa panahon sa pandemya.
Apan dili kini makapahunong nila sa pagserbisyo ug pagkuha sa mga impormasyon nga kinahanglan itigom.
Adunay 13 ka mga enumerator sa matag 27 ka barangay sa dakbayan sa Mandaue.
Matod ni Suliva, nga sa dili pa sila moadto sa kabalayan, mag-courtesy call una sila sa barangay aron pagpahibawo sa ilang operasyon.
Human niini, aduna silay ocular inspection sa barangay aron pag-familiarize sa mga enumerator ngadto sa gi-assign nga barangay.
Gilaraw nasab ni Suliva nga aduna gyuy kabalayan nga dili mosugot sa pagpa-interview labi na karong panahona.
Apan sigon niya nga pasabton lang nila aron makasabot kini unsa ka importante ang census.
Matod niya, ang census mao ang gamiton sa gobyerno aron pagbahin sa resources ug alang sa mga proyekto nga ilang buhaton sa usa ka lugar.
Matag balay, ang interviewhon sa mga enumerator mao ang ulo sa panimalay o bisan kinsang miyembro nga makatubag sa ilang mga pangutana.
Kon aduna gyuy moinsister nga dili magpa-interview, matod ni Suliva, nga saboton lang nila kon unsay mas convenient nila.
Alang ngadto sa mga na-lockdown nga mga balay, mangayo sila og abag ngadto sa barangay kon aduna silay profiling sa mga balay nga na-lockdown tawagan nalang kini nila aron makuha ang impormasyon.
Ang laing pamaagi sab nila mao nga iuwahi nalang nila sa pagbisita ang mga balay nga na-lockdown.
Gani, ang usa sa team supervisor sa mga enumerator, si Jonathan Mayol, miingon nga ang labing dakong hagit nila sa ilang trabaho mao ang kooperasyon sa matag balay. Miawhag siya sa kooperasyon sa katawhan.
Gisiguro sab nila nga kanunay sila mag-mask, magdala og alcohol ug motuman sa social distancing aron sab sa paglikay nga mataptan sa virus o makapakatap sa maong virus. (KFD)