TULO ka menor de edad, duha niini babaye, ug usa ka lalake nga nagpangidaron og 15 ug 16 nga gipahimuslan sa usa ka 41 anyos nga lalake pinaagi sa pagpahubo niini atubangan sa camera, ang naluwas sa Cebu City Police Office (CCPO) sa San Carlos Heights Barangay Quiot, siyudad sa Sugbo Dominggo, Septiyembre 6, alas 12:10 sa kaadlawon.
Miabag sa maong malampuson nga operasyon ang mga sakop sa Women and Children Protection Desk sa CCPO ug ang Department of Social Welfare and Development (DSWD) 7.
Ang nasikop mao si Jose Nuñez Baylosis Jr. usa ka freelance contractor nga nagpuyo sa E. Sabellano Street sa Barangay Poblacion Pardo ning siyudad.
Matod ni Police Colonel Josefino Ligan, hepe sa CCPO, nakadawat silag impormasyon nga manguha siyag menor nga mga bata ug dalhon niya sa San Carlos Heights diin iya kining pahimuslan pinaagi sa pakighilawas ug videohan kini lakip na ang pagkuha niinig hulagway nga mga walay sapot.
Tungod niini, nihimo gilayon og surveillance ang CCPO pinaagi sa pag-monitor sa iyang Facebook account lakip na ang iyang mga lihok.
Dinhi nasuta nga kanunay siya nga magdalag mga bata sa maong dapit nga maoy hinungdan nga ila na dayon nga giplanohan ang pagluwas sa mga biktima.
Dugang ni Ligan nga sa dili pa pahimuslan ang mga batan-on, iya una kini pakan-on sa mga mahalon nga kan-anan sa siyudad sa Sugbo ug paimnon usab niya kinig ilimnon nga makahubog.
Kon makuha na niya ang simpatiya ug pagsalig sa mga biktima, dinhi na niya kini pahimuslan.
“Ang information nga among nakuha ani niya is dugay nani iyang ginabuhat diay nga manguha siyag minor, iyang dalhon somewhere sa San Carlos Heights. He will ask them to have sex then videohan niya,” matod ni Ligan.
Wala pa hinuon masuta kon ibaligya ba sa suspetsado ang video sa ilang pakighilawas.
Giingong dugay na kining gihimo ni Baylosis gani aduna nay mga reklamo sa kabataan sa siyudad sa Talisay ug sa Pardo nga sila gihilabtan niini ug kuhaan pa og video.
Nakuha sa mga operatiba ang tulo ka mahalon nga cellular phone sa suspetsado nga gi-turnover na karon sa Regional Anti-Cyber Crime Unit 7 aron masusi kon adunay mga hubo nga hulagway sa mga bata.
Kalapasan sa Republic Act 9208 (Anti-Trafficking in Persons) as amended by RA 10364 (Expanded Anti-Trafficking in Persons) ang atubangon sa suspetsado.
Samtang ang tulo ka menor naa na sa kustodiya sa DSWD aron ipaubos sa stress debriefing.
Awhag sa kapulisan ngadto sa mga ginikanan nga adunay mga anak babaye nga menor de edad nga monitoron ang ilang mga bata aron dili mabiktima sa mga mapahimuslanon sa ilang kabatan-on. ug kahuyang. (AYB)