DOBLE ang kagul-anan sa pamilya ni Cebu Gobernador Gwendolyn Garcia human sa pagtaliwan sa laing kinabuhi sa iyang duha ka mga manghod nga lalake sud lang sa usa ka semana.
Dominggo sa buntag, Septiyembre 6, nakabsan sa gininhawa si Barili Mayor Marlon Garcia sulod sa Chong Hua Hospital.
Niadtong Martes, Septiyembre 1, unang namatay si kanhi Dumanjug Mayor Nelson Garcia.
Si Winston Garcia, chairman sa Cebu CFI Community Cooperative, maoy unang nipahibalo sa publiko pinaagi sa iyang social media site kagahapon, Septiyembre 6.
“To lose one brother is painful enough, but to lose another brother in the same week, my heart just can not take any further. The true fighter that he was, my brother, Marlon has been fighting for his life for the last few weeks,” tipik sa asoy ni Garcia.
“This morning (September 6), he joins my brother, Nelson, and my mother in heaven,” dugang niya.
Kahinumdoman nga sa Agusto 6, gipahibalo ni Cebu Governor Gwendolyn Garcia nga nataptan sa coronavirus disease 2019 (Covid-19) ang iyang igsuong si Marlon.
Gisundan usab kini sa pagpahibawo ni Barili acting Mayor Julie Flores nga gipaubos ang pasyente sa intesive care unit (ICU) apan human sa tulo ka adlaw, nakagawas na kini sa maong pasilidad.
Pinaagi usab sa social media site, gibutyag ni Governor Garcia nga pipila ka semana ang milabay nga padayong nakigbatok ang mayor sa Barili aron hingpit kining makabalik sa pagserbisyo.
“In the weeks leading to his untimely passing, Mayor Marlon was eager to be discharged so he could continue on in his relentless efforts for the economic revival of Barili. Mayor Marlon fought bravely until the very end,” pamahayag ni Gwen.
Ang 58-anyos nga mayor sa Barili, nagserbisyo na sa naasoyng lungsod sukad sa 2016 diin na reelect sa 2019.
Wala na mohatag pa og dugang impormasyon ang pamilya labot sa kamatayon niini.
Gihandom sa pamilyang Garcia si Mayor Marlon isip mapinanggaon ug matinud-anon sa pagserbisyo sa katawhan ilabi na sa lungsod sa Barili.
“My brother was a loving husband, son, father, grandfather, brother, cousin, uncle, and friend who served his people proudly as Mayor of Barili. I love you very much and I will miss you dearly, Marlon.” asoy ni Winston Garcia.
Lima ka adlaw sa Septiyembre 1, sa wala pa ang panghitabo una na usab mitaliwan ang iyang igsuon nga si anhing Nelson Garcia nga kanhi mayor sa lungsod sa Dumanjug.
Na-admit ang magsuon sa Chong Hua Hospital.
Base sa pasiunang reports si Mayor Garcia maoy ikapito nga mayor sa Sugbo nga nataptan sa Covid-19 sa Sugbo lakip na ang mga mayor sa siyudad sa Lapu-Lapu Junard Chan, Michael Angelo Sestoso sa Alcoy, Sun Shimura sa Daanbantayan, Danilo Diamante sa Tuburan, Jose Antonio Pintor sa Asturias ug Lakambini Reluya sa San Fernando.