SUPERBALITA DAVAO

Roldan: Mag-presidente di lalim

Nota Bene

LIBOAN ka mga pribadong establishments ang nanira o nagtangtang og mga trabahante tungod sa Covid-19. Niadtong Domingo, gidapit ako sa birthday party ni "Boy" didto sa San Juan, Agdao.

Nalipay lagi unta siya nga nagsaulog sa iyang ika-58 nga adlaw'ng natawhan kauban sa iyang mga mahal sa kinabuhi ug mga higala apan subo tungod kay naapil siya sa gitangtang sa trabaho sa Holy Cross College of Davao.

Duha ka dekada na siyang nagtrabaho sa eskwelahan og diha niya gikuha ang ilang adlaw-adlaw nga panginahanglan sa panimalay ug sa pagtungha sa duha niya ka anak.

Apan lagi kay nagsangkiig man ang ilang eskwelahan kay nigamay ang nagtungha ug kasagaran niini sa online na lang busa dili na kinahanglan ang iyang trabaho sa pag-atiman sa sound-system ug laboratory sa eskwelahan.

Hinuon, gihatagan sila'g termination fee nga 28 days matag tuig sa trabaho. Kung ibutang nato nga nagsweldo siya'g P20,000 matag bulan, modawat siya'g mga P420,000 sa iyang kinatibuk-ang serbisyo.

Gidawat niya kini bisan bug-at sa dughan miyentras anaa pay ikabayad ang iyang gitrabahoan kaysa magdeklara kini'g pagkabangkarute nga lisod na mabayran ang mga trabahante.

Nagkapuliki karon ang Department of Labor and Employment sa pag-atiman sa mga negosyo nga nanira og gusto na'ng manira kay nahapay. Kinsay dili mahapay nga hasta gani ang gobyerno nangutang na pud aron adunay magamit nga pangsweldo sa ilang mga kawani kay nahapay na pud?

Kung wa ko masayop, sobra P400 bilyon na ang nagasto sa gobyerno kontra Covid-19. Karon nga hapit na moguwa ang bakuna sa maong sakit, nagkinahanglan na sab og binilyon nga sapi ang gobyerno sa pagpalit sa maong bakuna og sa pagbakuna sa halos 100 milyon ka mga Pinoy sa nasud.

Nisakit pud ang ulo ni PRody Duterte kung asa mangutang aron lang makapalit og bakuna. Kamo kunoy presidente kung lalim ba? Kung lantawon nato ang iyang dagway, makita nga gibug-atan na gyod siya sa iyang trabaho karon ilabi na nga nagkatiguwang na siya og naay balatian nga gihambin.

Gihugonhugon gani sa nilabay'ng duha ka semana nga nidalikyat siya sa Singapore aron magpatambal. Didto sa Singapore mangadto ang mga sapian aron magpatambal. Nindot kuno ang serbisyong medikal didto nga bisan ang himatyon na basta may kwarta, pwedeng buhion.

Kaniadto ang nagpa-dialysis kutob ra'g 1 o 2 ka tuig ug matigok na apan karon molahutay pa'g 10-15 ka tuig depende sa gidaghanon sa imong sapi ug gawi. Mas nauna pa'g kamatay ang nagbantay kaysa ang masakiton.

Naay nakaplagan karon nga "stem cell technology" diin mobalik og kaabtik ang piyesa sa atong lawas nga daw "brand new" na apan lagi hastang mahala. Balik gihapon ta sa kinsay sapian ang modunar niining kinabuhia.

Si anhing Madam Catalina Santos nga kapikas ni kanhi Mayor Luis T. Santos nga tag-iya sa Sto. Niño Shrine sa Matina nagpalit og kaugalingong dialysis machine aron mabuhi ug dugay. Tuod man dugay siya nga namatay og iyang gigahin ang iyang kinabuhi sa debusyon sa Sto. Niño. Busa kadtong modagan sa pagka-presidente sa 2022 mag-isip-isip una.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph