NALIPAY na unta ko sa balita nga mobalik na sa free TV ang ABS-CBN. Apan naguol ko pagbasa nako nga sa Channel 11 sila mogawas nga hawod kabati ang reception. Di man gani makita ang Channel 11 sa amoa.
Ang ABS-CBN nag-blocktimer or nipalit karon og airtime sa Zoe TV’s Channel 11 ni Bro Eddie Villanueva. Ang unang mga ipasalida nila ang FPJ’s Ang Probinsyano ug TV Patrol.
Giingong nisugot na sab si Bro Eddie nga mag-blocktimer ang ASAP Natin ’To ug It’s Showtime.
Tin-aw man ni sila kadtong blocktimer pa sad nila ang GMA-7. Basin diay og mobalik ni sila og katin-aw karong naa na nila ang ABS-CBN.
Ato nang mahibaw-an karong Sept. 28 inig launch nila sa Kapamilya shows.
KAPUSO NA?
Sumsoman karon sa showbiz nga mopirma na sa di madugay ang Kapamilya singer-actor nga si Khalil Ramos sa Kapuso Network aron makauban ang iyang palalab nga si Gabbi Garcia.
Ang tanang contract stars karon sa ABS-CBN gihatagan na og kagawasan human wala na gi-renew sa Kongreso ang ilang prangkisa.
Apan samtang ubay-ubay ang nanamilit sama nilang Pokwang, Jessy Mendiola ug Korina Sanchez, daghan sa mga sikat ang nagpabilin pa gihapong Kapamilya, sama nilang Kathryn Bernardo ug Daniel Padilla, Liza Soberano ug Enrique Gil, ug Joshua Garcia ug Julia Barretto.
GERALD-JULIA
Sumsoman sad karon sa showbiz ang giingong nagkalaming relasyon nilang Gerald Anderson ug Julia Barretto.
Bisan kon daghan na ang nakakita nilang nag-date sama sa dihang nakit-an si Julia sa resort ni Gerald sa Zambales apan no comment gihapon ang ilang drama. Pero wa sad sila mo-deny.
Wa man say dautan tingali kay pareho man silang single and ready to mingle. Si Bea Alonzo naa na say iyang Dominic Roque.
Di na lang sad ta mahibong aning Julia. Kamo na lang say pag-Barretto.
NETFLIX
Ngano man ning MTRCB hasta Netflix gusto i-regulate? Kon duna may mga adult scene dinha responsibilidad na na sa mga edaran nga maoy nagbayad sa maong video streaming platform.
Unsa ra man gud nang Netflix uy kon itandi sa kadaghang porn sites nga nagkalata sa online.
Daghang salamat diay sa Carmen Copper Corporation sa gipada ninyong ayuda sa mga sakup sa media. Usa intawon ko sa napiskan. Dako na kaayo ning tabang intawon. Huhu...