MODERNO na? Akong tan-aw morag di na gyud makabalik og dagan ang karaan nga mga PUJ (public utility jeepney) kay gihatagan og lugway sa Land Transporation Franchising Regulatory Board, Region 7 (LTFRB-7) hangtud Sept. 15 ang special permit sa mga bus ug modern PUJs nga moserbi sa dakbayan sa Sugbo ug Metro Cebu.
Sukad nga gipaubos kita sa general community quarantine (GCQ), ang mga bus ug MPUJs na ang nanagan nga depasaheroan. Gani, sa niadtong enhanced community quarantine (ECQ) pa, ang mga lokal nga kagamhanan naghatag og libre nga sakay gamit ang bus alang sa mga frontliner nga nagtrabaho sa mga hospital.
Ang mayoriya nga mobiyahe dinhi sa dakbayan sa Sugbo ug Metro Cebu nalipay nga bus o MPUJs na ang ilang masakyan tungod kay haruhay ang ilang pagsakay labina karon nga limitado pa ang pasahero sa katunga sa bus tungod ning pandemia sa Covid-19.
Ang mulo sa ubang pasahero kay dili tanan rota maagian sa bus kay di sila gusto molakaw pa padung sa bus stop. Unsaon man nga ang kadaghanan sa mga pasahero naanad man sa PUJ nga, ingnon tang punga, anha mosakay ug mokanaog sa atubangan sa ganghaan sa ilang balay.
Ang lain nga isyu nga atubangon sa atong kagamhanan mao ang pagtabang sa mga PUJ operator ug driver nga mawad-an sa negosyo ug trabaho ig-abot sa panahon nga di na gyud padaganon ang mga PUJ tungod sa daghan nga isyu sama anang kapin na sa 15 anyos ang PUJ ug di mahimo nga magsikit og lingkod ang pasahero tungod sa Covid-19.
Akong mahinumduman nga ang atong kagamhanan ubos ni Presidente Duterte nag-agni sa mga PUJ operator ug driver nga magmoderno na og mga sakyanan tungod ug alang sa kaayohan sa atong kalikupan. Apan nagdumili ang pundok sa mga PUJ operator ug driver nga magmoderno na sa ilang PUJ. Gani, nagsige sila og hulga sa transport strike.
Sa wala pa ang pandemia sa Covid-19, ang atong kalikupan hugaw na kaayo ug ang hangin nga atong mahanggap makadaut na sa atong panglawas tungod sa hugaw nga emisyon gikan sa mga PUJ nga di maayo pagkamentinar. Kapila na kahigayon kaniadto sa wala pa ang coronavirus nga makasunod ko og PUJ nga itom kaayo ang aso, apan wa mapaundang sa kagamhanan.
Di malalis nga sugod niadtong buwan nga gi-imponer ang kwarentinas tungod sa pandemia sa Covid-19, diin gidid-an ang biyahe sa tanan mga sakyanan gawas sa emergency, pulis, ug ang mga nagtrabaho sa kagamhanan ug hospital, nalimpyo ang atong kadalanan ug ang mga tanom nga atong makita milipang og maayo.
Kagahapon, miorden ang LTFRB nga pun-an og 40 ang 201 ka mga bus ug MPUJs nga karon nagbiyahe na sa Metro Cebu aron masilbihan pa ang daghan nga pasahero, nga kadaghanan mga empleyado, tungod kay ang mga non-essential nga negosyo nangabli na man.
Alang sa kaayohan sa tanan, maayo unta og mga bus/MPUJs na lang gyud ang mga depasaheroan.