USA ka balaudnon nga gipangamahanan ni Senador Panfilo “Ping” Lacson ang naka-pending karon sa Senado. Gitawag kini og Designated Survivor bill. Gisugyot ni Lacson sa maong balaudnon nga ang Presidente makatudlo og mohulip kaniya kon simbako dili usab maka-asumir ang Bise Presidente, Senate President ug Speaker of the House kon mamatay ug ma-disabled ang Presidente.

Anaa sa Section 7, Article 7 sa atong 1987 Constitution ang proseso sa paghulip sa Presidente kon mamatay kini, ma-disabled, mo-resign o matangtang pinaagi sa impeachment. Apan kon pananglitan mamatay usab ang Bise Presidente, Senate President ug Speaker of the House dungan sa Presidente, kinsa man ang mopuli?

Sa balaudnon ni Lacson, iyang gisugyot nga ang usa ka beterano nga senador o kongresista, base sa ilang gidugayon sa serbisyo, maoy mohulip. O ba kaha, usa ka sakop sa Kabinete nga itudlo sa Presidente nga maoy designated survivor ug maoy mamahimong caretaker kon adunay mahitabo kaniya ug sa iyang successors.

Taguon ang maong Cabinet member ug dili ibutyag sa publiko ang iyang pangalan. Advanced kaayo ang hunahuna ni Lacson no? Pero posible baya nga mahitabo kini. Kuyaw na kaayo ang kahimtang karon. Kon aduna diay pagpamomba nga himuon sa mga terorista Pero nahibawo ba mo kon diin kini gikuha o gikopya ni Lacson? Sa Netflix series nga “Designated Survivor” nga gibituonan ni Kiefer Sutherland.

Buot sa senador nga duna na gyuy balaud nga magtumbok na daan sa mopuli kon simbako mahitabo ang iyang gikalisangan nga mahitabo. Apan unsa kaha ka kasaligan ang maong balaudnon kon mahitabo kining maong situwasyon. Walay mandatu gikan sa katawhan kanang maong tawo. Tuhuan kaha siya? (bobbygnalzaro@gmail.com)