WA MAKASABOT sa iyang gibati ang presidente sa volunteer responders sa lungsod sa Sibonga, habagatang Sugbo, dihang iyang nakita nga dunay mga “luha” sa mga mata sa imahen ni Birhen Maria sa Dominggo sa gabii, Septiyembre 6, 2020 sa Monastery of the Holy Eucharist sa Barangay Lindogon, Sibonga.
Matod ni William George Baynosa, sa interbyu sa Superbalita Cebu, nga una kadtong higayon nga nakakita siya sa “paghilak” sa imahen sa Birhen.
Si Baynosa, pangu sa volunteers sa Municipal Disaster Risk Reduction and Management Office, niadto aron motabang sa crowd control nunot sa pagdagsa sa mga deboto tungod sa kapistahan sa Adlaw nga Natawhan ni Birhen Maria kun Nativity of Mary nga gisaulog sa simbahang Katoliko karong adlawa, Septiyembre 8, 2020 mas naila nga Birhen sa Simala.
Dugang ni Baynosa nga gibutang ang rebulto sa mahal nga Birhen sa Lindogon sa gawas sa gate sa simbahan alas 6 sa gabii sa Dominggo aron bilaran sa mga deboto.
Niadtong higayuna, kalit lang usa mga tigduma sa simbahan nihilak atubangan sa imahen ug sa dihang gipangutana sa gwardiya, nitudlo kini nga ang imahen “naghilak.”
“Natingala ang mga residente sa duol nganong dunay saba sa sulod. Mao nang nanuktok ang mga residente ug nigawas ang head guard ug maoy mipahibalo nga nihilak ang birhen,” asoy ni Baynosa.
Tungod niini, ang mga tagdumala nipasulod og mga tawo nga tiglima aron di maghuot sa sulod niadtong tungora, inay nga magbilar lang.
Si Baynosa niingon nga nakasaksi gyud siya sa “paghilak” sa Birhen sa iyang pagduol sa imahen. “Tinuod gyud nga luha akong nakita. First time nako sa akong tibuok kinabuhi nga nakasaksi ko ug dili nako masabot ang akong gibati,” matod ni Baynosa.
Naghilak si Baynosa samtang niasoy sa iyang kasinatian sa Superbalita Cebu.
Usa sa misulod sa iyang huna-huna ang pagpasalamat sa Mahal nga Birhen sa Lindogon nga gidungog ang iyang mga pag-ampo sa katawhan ilabi na nga ang tanan nakatagamtama sa krisis nunot na sa pandemiya sa coronavirus disease (Covid-19).
“Sa akong upat ka tuig kapin nga pagka volunteer, kadto nga higayon lang nga wala ko kasabot sa akong kaugalingon nga nanglimbawot akong balhibo sa akong nasaksihan,”matod ni Baynosa. Gibalhin ang imahen sa gawas sa gate tungod kay ang kasamtangan nga gibutangan niini maoy himuong main chapel tungod sa selebrasyon karong adlawa.
Samtang ang head guard sa simbahan, Felix Carpentero, nga nahinabi usab sa Superbalita Cebu, niingon nga kadto ang unang higayon nga siya nakasaksi sa paghilak sa imahen.
Alang kang Carpentero usa ka tinuod nga milagro ang iyang nakita tungod kay ang Birhen anaa man sa gibutangan nga orna ug way ni bisan kinsa nga makahikap o bisan makaduol.
“Ako, Sir, bisan laki ko, pero mitulo gyud akong luha. Ambot kon ngano kaha wala ko kasabot sa akong gibati nga pagka kita nako sa iyang nawong,” matod ni Carpentero.
Si Carpentero ug iyang mga kauban maoy nagseguro nga masubay ang health protocol sa kagamhanan nga way pasudlon nga deboto nga di mag face mask ug mag face shield.
Unom lang ka mga tawo ang pasudlon matag batch sa deboto ug mohalad sa iyang pag-ampo. Ilang gihangyo ang mga deboto nga di magdugay aron makasulod usab ang ubang mga tawo.
Si Police Captain Alvino Inguito, hepe sa kapulisan sa lungsod sa Sibonga nga nahinabi sa Superbalita Cebu, niingon nga anaa sa dul-an sa 200 ka mga pulis ug force multipliers ang ipakatap sa Simala Shrine aron pagbantay sa kahapsay ug kalinaw sugod pa niadtong Dominggo hangtod na Miyerkules, Septiyembre 9.
“Sa pagkakaron alas 2 sa hapon karon nga adlaw nga Lunes anaa pa lang sa 70 ka mga tawo ang among ihap. Pero amo nang gipangandaman nga modaghan gyud ni,”matod ni Inguito.
Sa mga deboto nga mosulod, kon taga Sibonga, kinahanglan dunay valid identification (ID card), mag face shield ug mag face mask.
Sa mga di taga Sibonga, kinahanglan ang valid ID, medical certificate ug authority to travel gikan sa imong local government unit (LGU) nga giisyu sud sa 14 ka adlaw sulod sa imong pagbiyahe.