GIUNDANG na ang gilusad nga search and retrieval operation sa Incident Management Team sa 4 ka mga giingong mga tawo nga nalubong buhi sa gikubkob nga tunnel didto sa Barangay Kinamayan, Santo Tomas, Davao del Norte.
Human sa halos duha ka semana nga operasyon o ang gilusad nga #Kinamayan4, inabagan sa Bureau of Fire Protection Search and Rescue Unit ug Emergency Medical Service personnel, Municipal and Provincial Engineers' Office, Municipal and Provincial Disaster Risk Reduction Office, Davao City 911 Urban Search and Rescue Team, Knight Hawk Rescue Team sa Davao City ug Santo Tomas, Philippine National Police and the Armed Forces of the Philippines, ug uban pang mga grupo, nahukman sa IMT niadtong Lunes, Septyembre 7, nga undangon na kini gumikan kay imposible nang makita ang upat ka mga treasure hunters nga sila si Kayl Castañares, 18; Jerick Marquez, 23; Dindo Pañares, 18; ug Rustom Racho, 18, ug gawas pa peligro na kaayo ang lugar.
Nakab-ot ang desisyon human ang pito ka oras nga gihimong konperensiya niadtong Lunes, kon diin nadiskobrehan sa Extrication Team nga ang tunnel gilunopan na og tubig ug kung ipadayon pa ang pagpangita sa upat posibleng magbutang na sa kapeligro sa mga kinabuhi sa mga personahe sa IMT.
Nagpagawas sab ang Sangguniang Barangay sa Kinamayan og manifesto o public declaration, nga nag-awhag sa IMT nga ihunong na gilayon ang operasyon, kay ang padayong pagkubkob sa lugar makaguba na sa kasikbit nga kabalayan tungod sa kahumok sa yuta nga gikubkob.
Misumite sab ang Gagmay'ng Kristohanong Katilingban sa San Isidro Labrador og samang apela ngadto sa IMT subay sab sa hangyo sa ilang mga miyembro.
Kahinumdoman nga giingong nalubong ang mga biktima niadto pang Agosto 30, 2020 sa dihang gitaho ngadto sa mga awtoridad.