NAKATALA og usa ka patay sa coronavirus disease (Covid-19) ang Cagayan de Oro human nakabsan sa kinabuhi ang usa ka 61 anyos nga lalaki Sabado, Setyembre 6.
Ang lalaki usa ka residente sa Barangay Gusa. Usa siya sa 17 ka mga bag-ong nakumpirma nga mga kaso sa Covid-19 sa dakbayan.
Matud ni City Health Office Epidemiologist Dr. Joselito Retuya, ang lalaki usa ka cancer patient kinsa nagpakita og sintomas Agosto 27.
Sa Agosto 28, adunay siya'y ubo. Sa Setyembre 4, gi-admit siya sa usa ka pribadong ospital tungod sa kalisud sa pagginhawa.
Ang 61 anyos nga lalaki gi-swab Setyembre 6 ug ang resulta migawas nga positibo sa gabii sa maong adlaw.
Namatay siya kaadlawon sa Setyembre 6.
Ang iyang final diagnosis mao ang acute respiratory failure secondary to severe community-acquired pneumonia, acute hypoxemic respiratory failure, ug hypertensive cardiovascular disease.
Nailhan sa City Health Office ang tulo ka mga close family contacts sa 61 anyos nga lalaki, duha niini ang iyang kapikas ug anak. Silang duha nagpakita og sintomas ug gikatakda nga i-swab.
Ang kinatibuk-ang ihap sa kumpirmadong kaso sa Covid-19 sa Cagayan de Oro anaa na sa 390, diin 265 ang mga returning overseas Filipino workers/locally stranded individuals ug 125 ang mga lokal nga kaso.