Ferro gihulipan, gibalhin sa So. Luzon

SUGOD sa Septiyembre 9, 2020, bag-o na ang pangulo sa kapulisan sa Central Visayas.

Si Police Brigadier General Albert Ignatius Ferro gihulipan ni Police Brigadier General Jonnel Estomo, kanhi pangulo sa Anti-Kidnapping Group sa Camp Crame.

Ang pagbalhin kang Ferro gipirmahan ni Police Major General Joselito Vera Cruz, Acting Chief of Staff sa Camp Crame.

Si Ferro gitudlo nga acting chief sa Directorate for Integrated Police Operations sa Southern Luzon.

Si Estomo sakop sa Philippine Military Academy (PMA) Class of 1992.

Si Ferro nilingkod isip hepe sa Police Regional Office 7 niadtong Pebrero 6, 2020, takdo nga pito ka buwan ug tulo ka adlaw ang nakalabay.

Sukad sa iyang pag-asumer, subsob ang iyang kampanya batok sa illegal drugas.

Moabot sa kapin sa P500 million sa gituohang shabu ang nasakmit sa kapulisan, wala pay labot ang minilyon ka pesos nga balor sa marijuana.

Nipirma usab dayon si Ferro og kasabutan uban sa iyang mga police officials sa PRO-7 sa no take policy gikan sa illegal nga sugal ug drugas.

Sa iyang termino, nagsugod na usab ang pagkatap sa coronavirus disease 2019 (Covid-19) sa tibuok rehiyon.

Tungod sa pagsaka sa gidaghanon sa mga natakbuyan sa virus, girekomendar dayon ni Ferro ngadto sa Regional Inter-Agency Task Force nga ipaubos sa enhanced community quarantine ang Sugbo ug magbutang og mga border quarantine checkpoints.

Daghan sa iyang mga personnel ang natakdan, diin miabot og 551 ang natakbuyan, upat ang namatay.

Apan tungod sa pag-atiman ug sayo nga pag isolate kanila, napugngan pa ang pagpanakod sa ubang mga personnel.

Wa sila pasagdi ni Ferro, sila gibutang sa haruhay nga isolation area ug sa Malasakit at Makatao recovery facility nga giabagan sa Kagamhanan sa Siyudad sa Sugbo.

Tungod sa pagsulbong pa sa gidaghanon sa mga natakdan sa virus sa siyudad sa Sugbo, gipalambo ni Ferro ang contact tracing pinaagi sa pagpaubos sa tanang police personnel sa seminar nga gipangulohan ni Baguio City Mayor Benjamin Magalong nga kanhi director sa Criminal Investigation and Detection Group.

Aron mas epektibo pa ang contact tracing, gipaubos usab niya sa usa ka semana nga seminar sa John Hopkins University ang kapulisan.

Ang paglambo sa contact tracing maoy usa sa hinungdan sa pagkunhod sa kaso sa Covid-19 sa dakbayan sa Sugbo.

Matod ni Ferro nga mapasigarbuhon siya nga sulod sa pito ka buwan nga nahimong PRO-7 director daghan na silag nahimo ilabi na ang gubat batok sa illegal nga drugas.

“Nalipay ko that I was able to help sa atong mga kaigsuonan diri sa Sugbo on the part of the coming up with a better response,” matod ni Ferro.

Wala na siya masurpresa pa sa kamandoan gikan sa bag-ong milingkod nga PNP chief tungod kay alang niya normal lang kini sa hut-ong sa kapulisan.

“I am a good soldier I always follow orders,” dugang ni Ferro. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph