NIABOT na sa 89.7 porsiyento ang recovery rate sa dakbayan sa Sugbo niining padayon nga pakigbatok sa coronavirus (Covid-19), Septiyembre 8, 2020.
Samtang positive case sa Mandaue City anaa nalang sa sais porsiyento
Kasamtangan niabot na og 9,692 ka mga kaso sa Covid ang natala sa Department of Health apan ang 8,699 niini hingpit nang na-ayo sa Covid-19.
Apan subo palandungon nga ang 658 kanila og mayoriya niini adunay laing sakit nga gihambin hinungdan nga wala makaagwanta ug nakabsan sa ilang kinabuhi.
Si Mayor Edgardo Labella padayong miawhag sa publiko nga dili mokumpyansa sanglit bisan kon padayon ang pagkunhod sa kaso, anaa pa gihapon ang presensiya sa virus.
Sa laing bahin, mikunhod ang positivity rate sa Covid-19 sa swab testing sa Mandaue City nga gikan sa 20 porsiyento ngadtona sa sais porsiyento.
Niadtong Hulyo ang positivity rate sa dakbayan anaa sa 20 porsyento apan Septiyembre sais porsyento nalang kini.
Gitug-an ni Karlo Cabahug, pangulo sa diagnostic and testing team sa Emergency Operations Center sa Mandaue nga sa miaging semana adunay 20 ka indibidwal ang nipa-ubos sa RT-PCR swab test matag adlaw ug ang magpositibo niini sa Covid-19 usa lang ka digit.
Niadtong Septiyembre 3, 2020, bisan paman nga gipasakaan na nila ngadto sa 50 ka indibidwal nga i-swab test pabilin gihapon nga usa ka digit ang nagpositibo.
Usa kini ka maayong balita alang sa Mandauehanon tungod kay nagpamatuod nga bisan pa man sa kadaghang ipa-test sa dakbayan gamay ra ang magpositibo ug epektibo sab ang ilang stratehiya sa pagpugong sa pagkatap sa maong virusm, dasonni Cabahug. (PAC, KFD)