MAKABAYAD og multa nga P500 kadtong mga traysikad draybers sa lungsod sa Cordova sa higayon nga mopa-usbaw kini sa regular nga pletehan ngadto sa ilang mga pasahero.
Kini base sa kamanduan ni Cordova Mayor Therese Sitoy-Cho pinasikad sa iyang Executive Order 11 S. 2020 nga giluwatan.
Subay sa maong kamandoan nalatid niini ang mga protocol ug guidelines nga angayang subayon sa mga traysikol ug traysikad sa maong lungsod.
Aron nga makatuman sa physical distancing, usa lang ka pasahero ang gitugutan nga mosakay sa traysikad samtang duha ka pasahero sa traysikol, diin ang usa ang mahimutang sa atubangan og laing usa sa luyo nga bahin.
Ang lokal nga kagamhanan mipahibawo nga ang maximum standard fare sa lungsod tag-P20 sa matag pasahero alang sa traysikol samtang P10 alang sa mga pasahero sa traysikad.
Apan kadtong mosupak sa maong kamandoan ang makamulta og P500, laing multa nga moabot sa P1,000 ang ipahamtang sa mga drayber nga walay mayor’s permit to operate ug dugang P500 niadtong mga drayber nga walay lisensya.
Giawhag ni Sitoy - Cho ang mga pasahero nga dili magpanuko sa pagpahibawo ngdto sa iyang buhatan sa higayon nga adunay mga drayber nga abusado o mipahimulos sa higayon pinaagi sa pag-charge og pletehan nga molabaw sa regular rate fare. (ANV)