GI-MONITOR karon sa kapulisan sa Lapu-Lapu City ang kadagatan sa dakbayan kon adunay mga nangaligo nga di Oponganon.
Ang city director sa kapulisan PCol. Clarito Baja nipahimangno niadtong nagplano nga mangaligo og dagat sa Lapu-Lapu ilabi na niadtong gikan sa laing lugar nga kasamtangan unang gidili gumikan kay kalapasan kini sa quarantine protocol nga gipatuman sa kagamhanan, sigun usab sa kamanduan ni Mayor Junard Chan.
Ang Lapu-Lapu City Police Office adunay duha ka quarantine control checkpoint nga nahimutang sa duha ka taytayan nga nagdugtong sa Mactan ug Mandaue.
Di sab makalusot kadtong dili motug-an sa tinuod diha sa checkpoint. Gibutangan sab og mga personnel ang kabaybayonan nga mopahigayon og random check sa mga nangaligo ug magmatngon sab sa physical distancing.
Sa mga mangadto sa beach gikinahanglan adunay mask ug adunay quarantine pass.
Gidili ang pag-overnight gumikan sa curfew ordinance gikan sa 10:00 sa gabii ngadto na sa 5:00 sa kadlawon.
Gipahinumduman ni Baja nga gidili ang senior citizen ug kadtong mga nag-edad og 21 anyos paubos tungod kay nagpabilin pa ang “stay at home order” bisan nga ubos na sa modified general community quarantine (MGCQ) ang Lapu-Lapu City. (GCM)