NIMANDO si Gobernador Gwendolyn Garcia sa pagpahunong sa pagpangubkob og dolomite, mga mineral deposits ug uban pa nga quarry resources sa lungsod sa Alcoy.
Ang gobernador miluwat sa Executive Order (EO) 25 niadtong Septiyembre 8, 2020 nga nagmando sa Philippine Mining Service Corp. (PMSC) ug Dolomite Mining Corp. (DMC) sa pag-undang sa ilang quarry operation sa Alcoy.
Kini may labot sa nakontrobersiyal nga pagkuha og dolomite sa Alcoy nga gihimong “white sand” nga gigamit sa rehabilitation project sa Manila bay.
Sa sayo pa, si Bokal John Ismael Borgonia, pangulo sa environment and natural resources committee nga walay klarong pakig-alayon ang mga nagduma sa maong proyekto ngadto sa lokal nga kagamhanan.
Samtang ang Mines and Geosciences Bureau (MGB) sa DENR 7 nipasabot nga ubos sa balaod mahimong mo-isyu og permit ang ilang ahensiya ilabi na sa mga dagkong quarry projects.
Ang MGB niisyu og ore transport permit sa PMSC paghakot og pito ka metrikong toneladang dolomite alang sa maong proyekto.
KALAPASAN
Subay sa lagda ni Garcia gihimug-atan niini ang papel sa lokal nga kagamhanan may labot sa quarry o mining operation.
Ubos sa Section 8 sa DENR Administrative order No. 2020-21 gikinahanglan ang pagpahigayon og public consultation, public notice ug gikinahanglan ang public participation bisan unsa nga mining projects.
Gawas sa napakyas nga notice, gitumbok usab ni Garcia nga walay environmental impact study ang mga nagdumala sa proyekto sa posibleng mahitabo nga kadaot sa lungsod nga gikuhaan og supply.
Tungod niini milapas kini sa “precautionary principle” sa Environmental Law.
“There is no showing that the dolomite extraction, processing, transporting, sale and its final use in the Manila Bay shoreline has an impact study despite it being classified under Proclamation No. 2146 (The EIS Law) as an Evironmental Critical Project (Resource Extractive Industries) while the Origin of extraction is in and Environmentally Critical Area-Alcoy being declared habitat area of Cebu’s endangered bird “Siloy” or black shama,” matod pa sa gobernador.
Ang Kapitolyo may katungod sa pagkuwestiyon sa mga pamaagi sa proyekto nga ipahigayon sa lalawigan ilabi kon kon makamugna kini og kadaot sa kalikupan.
KONSTITUENTE
Subay sa cease and desist order ni Garcia gimandoan usab ang kapulisan og militar sa pag-enforce sa maong kamandoan sa lungsod.
Samtang si Alcoy Mayor Michael Sestoso, sa iyang bahin, niingon nga ang pagpahunong sa operasyon adunay dako og impact sa mga konstituente nanarbaho sa kompanya.
Apan nanghinaot siya nga ma resolbar ra kining dayon ilabi na nga apektado pa sa pandemya ang mga konstituwente niini.
“Siguro kabalo nata og mahunong naa pa gyud epekto pero basin sa sunod adlaw basin maresolbar ra sad,” matod ni Sestoso. (ANV)