HUMAN sa upat ka buwan nga pagsirado, gibuksan na pag-usab sa Kagamhanan sa Lalawigan sa Sugbo ang Cebu South Bus Terminal (CSBT) sa Septiyembre 9, 2020.
Mao kini ang gipahibaw ni Carmen Quijano, manager sa pasilidad.
Sigon ni Quijano nga di makasulod ang mga pasahero nga wa mag sul-ob og facemask ug faceshield. Ang “No Ticket, No Entry” policy padayon nga ipatuman sa terminal.
Isip pagtuman sa health protocol, gilimitahan sa 500 ka mga pasahero ang makasulod sa terminal sa usa ka higayon aron seguradong makapahigayon og physical distancing.
Sa miaging semana pa giandam sa management ang terminal alang sa subling pagbukas.
Sa mga buwan nga sirado ang terminal, gihimo kini ni Gobernador Gwendolyn Garcia og bagsakan center sa mga utanon ug isda gikan sa kalungsoran.
Samtang gihimong temporaryong bus terminal ang Lantaw SRP sa Cebu South Coastal Road (CSCR).
Gibutyag ni Quijano nga nimenos ang kita nga binuwan sa terminal epekto sa restrictions gumikan sa Covid-19.
“Pag month of March na unya hapit na ma lockdown, nimenos na gyud ang kita. Mokita man na og P6 million to P7 million. Mao nay kita sa terminal. Unya gumikan aning panghitabo nimenos gyud ang kita, dako kaayo og kabhang... unya kay menos man sad ang manakay kay mahadlok sad,” butyag ni Quijano.
Nanghinaot si Quijano nga sa hinayhinay, mahibalik ra ang kita sa terminal sa pagpaluag na sab sa restrictions sa kalungsoran.
Sa gilaoman nga pag dagsa sa mga tawo sa terminal, namutang na daan ang CSBT og tents sa daplin sa kadalanan nga maoy mahimong kapasilungan sa mga pasahero nga maglinya paghuwat sa ilang turno nga makasulod.
Dugang ni Quijano nga sa pagkakaron, moabot pa sa 20 ka mga buses ang nagbiyahe sa kalungsoran sa habagatang Sugbo sukad sa quarantine.
Kini bisan pa kon ang Lalawigan sa Sugbo ubos na sa modified general community quarantine sud sa tulo ka buwan.
Ang maong mga buses mao kadtong nakakuha og permit ug prangkisa sa Land Transportation Franchising and Regulatory Board (LTFRB) .
“Ato lang i-awhag sa tanan nga passengers ha nga dili gyud mi mopasulod basta walay facemask, walay faceshield, walay papers nga para travel nila, ticket or passenger pass,” pahinumdom ni Quijano sa mga pasahero. (ANV)