SA PADAYONG pakigbatok sa nasod niining Covid-19 ug aron malikayan ang ubang hulga sa panglawas susama niining malnutrisyon ug vaccine-preventable diseases outbreak, ang Department of Social Welfare and Development (DSWD) mobalik na pag-monitor sa mga Pantawid Pamilyang Pilipino Program (4Ps) beneficiaries.
Tungod niini gipahibawo sa DSWD-Central Visayas ang tanang 4Ps beneficiaries nga mabalik na ang health compliance monitoring isip kabahin sa rekisito nga sila mahatagan sa maong ayuda.
Kahinumduman nga niadtong Pebrero temporaryo kining gihunong pinaagi sa Force Majeure resolution.
Ubos sa Rule VIII Section 15 sa Implementing Rules and Regulations sa Republic Act (RA) 11310 o ang 4Ps Act, mamahimong i-suspenso sa kalihim sa DSWD ang monitoring sa compliance sa mga beneficiaries ubos sa kahigayononan nga "force majeure."
Kini nagpasabot nga mamahimong makakuha gihapon ang beneficiary sa full grant bisan paman og wala'y compliance sa mga kondisyon sa mga pograma.
Lakip sa i-monitor sa 4Ps beneficiary kining gipadala ba gyud ang mga tinun-an sa tunghaan, pre ug post-natal care sa mga inahan, regular ug preventive check-ups sa mga bata nga nagpangedaron og 5-anyos paubos, deworming sa mga bata 14-anyos paubos, ug ang binuwan nga Family Development Session.
Giawhag sa DSWD-Central Visayas ang tanang beneficiares sa 4Ps nga mobisita sa ilahang tagsa-tagsa ka health centers ug motuman sa minimum health standards.
Dugang sa ahensya nga gikinahanglan nga mo-coordinate ang mga beneficiary sa barangay health workers kon unsaon pag-avail sa health services susama sa pagpa-schedule, home visit o telemedicine.
Hinuon wala pa hingpit gibalik ang Family Development Session ug gihisgutan pa kon unsaon kini pagbalik.