GIHIKYAD na sa Davao City Police Office (DCPO) ang mga angayang himuon sa subling pag-abli unya sa Roxas Night Market sa siyudad sa Davao sa Septyembre 12, Sabado.
Kini aron nga malikayan ang pagkatap sa sakit nga coronavirus disease (Covid-19) ug aron sab nga higpit nga mabantayan ang night market batok sa mga tawong buot moguba sa kalinaw ug kahusay sa dapit.
Sumala sa DCPO, kinahanglan nga tanan nga mosulod sa lugar magsul-ob og face mask, face shield ug permanenteng tumanon ang duha ka metros nga physical distancing.
Kinahanglan sab nga tanan motuman sa tulo hangtud lima ka segundos nga paghushos sa face mask alang sa facial identification una mosulod sa dapit.
Samtang gipahinumdoman sab sa kapulisan ang publiko, nga kadtong nag-edad og 21 anyos ug 60 anyos pataas, lakip na kadtong dunay risgo sa kahimsog sa panglawas ug mabdos, istriktong gidid-an nga makasuroy sulod sa market.
Gidid-an sab nga makasulod ang mga tawo nga magdala og backpacks, lakip na ang pagsul-ob og jackets.
Hugtan sab nga rekisahon ang mga hait nga hinagiban, lakip na mga armas.
Hinuon, gitugtan sulod sa night market ang pagdala og dayag o transparent nga sudlanan sa tubig o tumbler.
Kahinumdoman nga gipahibawo ni Mayor Sara Duterte-Carpio sa miaging mga semana nga ablihan na ang night market sa maong adlaw. Apan kinahanglan nga mga manindahay ug mga suplayer sa market mopailawom una sa reverse
transcription-polymerase chain reaction (RT-PCR) tests.
Giklaro sab ni Duterte-Carpio nga ang night market makaakomodar lang og 25 porsiyento sa mga vendors ug masahista nga magpuli-puli sa paghikyad sa ilang mga pagkaon ug serbisyo sa merkado matag duha ka semana. (WGM)