COTABATO CITY -- Patay ang 40 anyos nga lalaki human giingong gitukob og ukoy samtang nangisda sa suba alas 8:30 sa buntag niadtong Martes, Septyembre 8.
Sumala sa paryente nga si Memba Pandita nga namukot sa suba ang biktima nga si Datuali Pandita, ulitawo ug nagpuyo sa Barangay Damalasak, Pagalungan, Maguindanao Province, unahan lang sa ilang balay.
Apan giingong nasangit ang pukot ni Datuali sa ilawom sa tubig ug mora og gibira og dako nga isda, busa iya kining gisalom.
Apan miabot na lang og lima ka minutos, wala pa gihapon mitunga sa tubig ang ulitawo ,hinungdan nga daling nangayo og tabang si Memba sa iyang mga silingan ug gipangita ang biktima.
Human ang usa ka oras, milutaw na ang biktima sa tubig apan wala na kini kinabuhi.
Sumala sa mga katigulangan sa maong dapit, posibleng gibira og ukoy o kaha dili ingon nato si Datuali ilawom sa tubig nga maoy hinungdan sa iyang kamatayon.
Wa sab gipadaplin ang posibilidad nga pag-ambak sa biktima sa tubig, naigo sa bato ang ulo niini, hinungdan sa iyang kamatayon.
Hinuon, gisusi pa sa kapulisan sa Pagalungan Municipal Police Station ang hitabo aron nga matumbok ang tinuod nga hinungdan sa pagkamatay sa ulitawo.