PATAY na nga napalgan sa iyang mga silingan ang usa ka lalake alas 6:30 sa buntag sa Miyerkules, Septiyembre 9, sa Purok Macopa, Barangay Libo, lungsod sa Sibonga, habagatang Sugbo.
Si Merlito dela Cerna Villasan, hingkod, minyo, dead-on-arrival (DOA) sa tambalanan sa dakbayan sa Carcar tungod sa grabing kadaot sa iyang ulo nga gituohang gibunalan og gahi nga butang.
Si Police Master Sergeant Herbert Pananganan, imbestigador sa Sibonga Police Station nga nahinabi sa Superbalita Cebu, nagkanayon nga si Villasan nag-inusara sa iyang payag human gibiyaan sa iyang pamilya.
Ang mga silingan nibutyag nga Martes sa alas 10 sa gabii, ilang nakit-an si Villasan sa iyang payag nga nagsige og yawyaw.
Usa ka silingan nga si Janet Tormis, nakadungog sab kang Villasan ala una na sa kaadlawon Miyerkules nga naghilak, nagping-it sa kasakit.
Wa nila panumbalinga kay naanad na sila nga kanunay nga saba kaayo, magabiiuig kadlawon, tungod sa gihambing problema sa pangisip.
Apan nakugang nalang sila pagkabuntag nga nagkadugo na ang ulo ni Villasan hinungdan nga ilang gidaladala sa tambalanan.
“Basin gisabaan, Sir. Tan aw namo ani gibunalag magahing butang ang ulo sa biktima,” dugang ni Pananganan.
Nagpadayon pa ang ilang imbestigasyon sa kremin. (GPL)