WALA mahinayon ang pagrelibo sa katungdanan ni Police Brigadier General Albert Ignatius Ferro isip direktor sa Police Regional Office (PRO) 7.
Si Police General Camilo Cascolan, bag-ong niasumier nga hepe sa Phillipine National Police (PNP), nipadala kaniya og mensahe.
“Kagabii (Septiyembe 8), I was informed by our chief PNP that i’ll remain and stay put here in PRO 7 and wait for further instruction..” matod ni Ferro.
Nangandam na unta siya aron modawat sa bag-ong pangatungdanan isip hepe sa Directorate for Integrated Police Operation Southern Luzon apan tungod sa maong kalamboan, magpabilin kini nga hepe sa kapulisan Central Visayas.
Wala pa matino kung hangtod kanus-a kutob nga mahimong hepe sa PRO 7 si Ferro tungod kay mag-agad ra kini sa kamandoan sa ilang labaw.
Kadtong mga heneral nga sobra na sa usa ka tuig nga milingkod sa ilang posisyon maoy apektado sa gihimong lapad nga lahugay sa PNP, matod ni Ferro.
Si Ferro pito pa ka buwan pa lang ug tulo ka adlaw sukad siya milingkod isip hepe sa PRO-7 sugod niadtong Pebrero 6, 2020.
Nahimong epektibo ang iyang mga programa pag batok sa coronavirus sa tibuok rehiyon 7 diin ang yawe niini mao ang pagpatuman sa gitawag niini nga I5 strategic action plan sa kapulisan.
Miabag usab ang PRO 7 sa mga silingang rehiyon sa Kabisay-an sama sa region 6 diin nagpadala si Ferro og contact tracer nga nibansay sa mga pulis sa maong lugar aron mahimong epektibo ang pagpangita sa mga nagpositibo sa Covid-19.
Misaka ang gidaghanon sa kaso sa Covid-19 sa Western Visayas ug tungod niini, gipangsirado karon sa kapulisan ang ilang mga utlanan .
Samtang, usa sa mga mando ni Cascolan kang Ferro mao ang pagpahugot sa ilang kampanya batok sa ilegal nga druga ilabi na nga miluag ang quarantine level sa rehiyon 7.
Mapasigarbuhon si Ferro nga wala nay sakop sa PRO 7 ang nagpabilin sa isolation area sa Covid-19.
Matod ni Ferro, ang gipaubos pa sa isolation mao ang mga personnel gikan sa regions 6 ug 8 lakip na kadtong naa sa regional training center sa Consolacion.
Kagahapon, Septiyembre 9, laing pito pa ang naka-recover ug gipagawas sa Makatao Malasakit Recovery Center sa Cremdec sa Brangay Taptap, siyudad sa Sugbo.
Sa talaan sa Regional Health Service (RHD) 7, moabot ngadto sa kapin 540 ka mga pulis sa tibuok rehiyon 7 ang natakbuyan sa Covid-19. (AYB)