COTABATO CITY -- Wa na madala pa sa balay tambalanan ang usa ka lalaki sa dihang patay gilayon human girakrakan sa mga armadong lalaki alas 11:20 sa buntag, Miyerkules.
Wala pa mailhi ang biktima kinsa gihimulbolan sab sa mga personal nga mga gamit.
Sumala kang Maguindanao Police Provincial Office Director Colonel Arnold Santiago nga sakay ang biktima sa iyang motorsiklo nga XTZ Yamaha nga dunay plaka MA-96507 sa Guindulungan, Maguindanao Province.
Apan kalit lang mibutho sa daplin sa kalsada ang mga armado ug girakrakan siya ug daling nanibat, bitbit ang pitaka, relo ug cellphone sa biktima.
Wala na hinuon madala ang motorsiklo sa biktima gumikan kay wala na kini moandar.
Ang patay'ng lawas sa biktima gidala sa mga pulis ngadto sa Villa Funeral Homes sa Cotabato City.
Grupo sa Bangsamoro Islamic Freedom Fighters ang gitudlo nga maoy namusil sa biktima. (Edgar E. Fuerzas)