BANSALAN, Davao del Sur -- Napuno og komento sa mga nabalakang netizens ang gihimo sa usa ka miyembro sa Lesbian Gay Bisexual Transgender (LGBT) nga maoy ika-dose nga kompirmadong kaso sa coronavirus disease (Covid-19) sa lungsod.
Nasayran nga nakahimo pa og suroy-suroy ang maong pasyente bisan og gibutang siya sa isolation unit sa Barangay Dolo sa lungsod.
Sa datos nga gipaguwa sa Task Force Covid-19, nasayran nga nag-edad og 20 anyos ang LGBT kinsa usa ka locally stranded individual (LSI) gumikan nagtrabaho sa kaulohang Manila.
Miabot siya sa Davao International Airport niadtong Agosto 26, ug gisundo sa Task Force (TF) Covid-19.
Subay sa health protocols sa Davao City nga mao ang pagkuha og RT-PCR test sa tanang LSI o pasahero sa airport sa ilang paghidangat ug pahibaw-on gilayon sila sa resulta nianang pagka-sunod adlaw.
Ang test gihimo sa One World laboratory clinic ug mao sab kini ang mopadala sa resulta ngadto sa mga Municipal Health Office (MHO).
Apan sumala sa TF Covid-19 nga wa siya makadawat og resulta sa iyang test, hinungdan nga giimbestigahan kini sa MHO.
Sa pag-abot sa pasyente sa lungsod, gilayon kining gihatud ngadto sa duty midwife sa Barangay Dolo aron ipahimutang sa isolation unit.
Nasayran nga dihang milakaw ang midwife sa isolation facility, nakahigayon ang pasyente sa pag-adto sa Bansalan Public Market ug mibisita sa kanhi niya kauban sa trabaho.
Nakahimo sab kini pagpanihapon kauban ang mga higala sa samang adlaw, una miuli sa isolation facility.
Nagpagawas na og closure order ang lokal nga gobyerno sa mga dapit nga giadtoan sa pasyente.
Niadtong Agosto 27-31, nakadawat na sab og taho ang TF Covid-19 nga mitambong ang pasyente og mga birthday party, social gatherings, ug dinner sa barbeque avenue.
Apan hugot kining gilimod sa pasyente mao nga mihimo na og imbestigasyon ang contact tracing team.
Septyembre 1 dihang mitambong na sab og lamay ang pasyente sa usa ka punerarya sa Km. 77 sa Barangay Tubod ug nianang pagka-ugma sa laing birthday party ang gitambongan niini mao nga gisubay na kung asa nga barangay.
Gumikan kay wa mosumite og kopya sa swab test ang pasyente, gipailawom kini sa MHO sa test niadtong Septyembre 1 ug migawas ang resulta niadtong Septyembre 3 nga positibo sa Covid-19.
Ang tanang nailhan nga close contacts sa pasyente gipailawom na sa monitoring ug gitakda ang Rapid Diagnostic Test (RDT) human sa pito ka adlaw nga exposure subay sa protocol sa Department of Health.
Ugaling mag-positibo ang resulta sa RDT sa mga close contacts sa pasyente, ipailawom dayon sila sa RT-PCR test. (Orlando B. Dinoy)